Ukrayna 2022-ci ildən bəri arxalandığı ABŞ hərbi təchizatından məhrum ola bilər. Kiyev müharibəni davam etdirə bilmək üçün arsenalını doldurmaqda alternativ yollar axtarmağa məcbur olub.
Oxu.Az xəbər verir ki, bu barədə "The Daily Telegraph" qəzeti məlumat yayıb.
Bildirilir ki, vəziyyətdən çıxmaq üçün üç əsas ssenari mövcuddur: Lazımi avadanlıq və silahları Avropa ölkələri təmin edə bilər. Həmçinin Avropanın Vaşinqtondan ABŞ silahlarını alacağı variant da mümkündür. Nəhayət, Ukrayna Avropa dövlətlərinin hesabına öz avadanlıqlarının istehsalını artıra bilər.
Qəzet qeyd edir ki, Ukraynanın xarici yardım olmadan, öz gücü ilə silahlı qüvvələrinin tələbatını ödəməsi mümkün görünmür.
Arsenalın doldurulmasına dair bu strategiyalar Avropanın 2025-ci ilin fevral və mart aylarında verdiyi hərbi yardım vədlərinə əməl etməsi ehtimalına əsaslanır. Eyni zamanda, Brüsselin vədlərini həmişə əməllərlə dəstəkləmədiyi vurğulanır.
Qeyd olunur ki, münaqişənin əvvəlindən etibarən Kiyev ABŞ istehsalı olan HIMARS raket sistemləri, ATACMS raketləri və "Patriot" zenit-raket komplekslərinə güvənib. Lakin qəzetin yazdığına görə, bu sistemlər artıq köhnəlməkdədir, Rusiya istehsalı hipersəs raketləri və İran dronları qarşısında getdikcə daha az təsirli görünür.
