Almaniyada hərbi bazada bir həftədə üçüncü təxribat: Hökumət sakinlərə su istifadəsini qadağan etdi

Naməlum şəxslər Mexernix şəhərində (Şimali Reyn-Vestfaliya federal torpağı) Bundesverin (Almaniya Silahlı Qüvvələri) bazasını su təchiz edən su qülləsinin hasarında deşik açıblar, mütəxəssislər suyun zəhərlənib-zəhərlənmədiyini araşdırırlar.

Oxu.Az-ın verdiyi məlumata görə, bu barədə "Bild" xəbər yayıb.

Yerli səhiyyə idarəsi sakinləri hələlik sudan, hətta duş qəbul etmək üçün də istifadə etməməyə çağırıb.

"Mexernix şəhərinin içməli su təchizatı sisteminə icazəsiz giriş səbəbindən içməli suyun sağlamlıq üçün təhlükəli çirklənməsi baş verə bilər", - deyə hakimiyyət orqanları qeyd ediblər.

Hasardakı dəliyi Köln kazarmalarında və Qaylenkirxendəki NATO bazasında baş verən hadisələrdən sonra su təchizatı obyektlərinə nəzarəti gücləndirən hərbçilər aşkar ediblər.

Qeyd edək ki, həftənin əvvəlində Kölndəki Bundesver kazarmaları ziyarət üçün bağlanıb. "Spiegel" nəşrinin məlumatına görə, hərbi hissənin ərazisindəki su kəmərinin suyu çirklənə bilərdi. Hasarda dəlik aşkar edilib və istintaq bundan belə nəticəyə gəlib ki, naməlum şəxslər hissənin ərazisinə daxil ola bilərdilər. Polis obyektin ərazisinə qanunsuz daxilolma şübhəsi ilə araşdırma aparır.

Mümkün təxribat şübhələri səbəbindən çərşənbə günü Almaniyanın qərbində, Qaylenkirxendə (Şimali Reyn-Vestfaliya federal torpağı) NATO-nun kəşfiyyat təyyarələrinin yerləşdiyi aviabaza bağlanıb.