İyulun 7-də Ankarada NATO sammiti çərçivəsində baş tutacaq Türkiyə və ABŞ prezidentləri Rəcəb Tayyib Ərdoğan ilə Donald Tramp arasındakı görüşün gündəliyinə Rusiya və Ukrayna danışıqlarının Türkiyə ərazisində yenidən başlaması məsələsi daxil ediləcək.
Oxu.Az xəbər verir ki, bu barədə Türkiyənin "Milliyet" qəzeti məlumat yayıb.
Nəşrin məlumatına əsasən, tərəflər dörd əsas mövzu qrupunu nəzərdən keçirməyi planlaşdırırlar. Birinci bloka müdafiə sənayesi sahəsində tərəfdaşlıq, xüsusilə "Kaan" qırıcıları üçün 700 milyon dollarlıq mühərriklərin Türkiyəyə tədarükü, "Amerikanın düşmənlərinə sanksiyalar vasitəsilə qarşı mübarizə" (CAATSA) qanunu üzrə məhdudiyyətlərin ləğvi və Ankaranın "F-35" istehsalı proqramına yenidən qoşulması aiddir.
İkinci və üçüncü qrup məsələlər iqtisadi sahəyə, o cümlədən qarşılıqlı ticarət dövriyyəsinin 100 milyard dollara çatdırılmasına və enerji, həmçinin nüvə enerjisi sektorunda əməkdaşlığa həsr olunub.
Ərdoğan və Trampın beynəlxalq və regional təhlükəsizlik məsələlərini, eləcə də Suriyanın bərpası, onun terrorçu qruplaşmalardan tamamilə təmizlənməsi və Fələstin-İsrail münaqişəsinin həllini müzakirə edəcəkləri gözlənilir. Qəzetin yazdığına görə, dövlət başçıları Ukrayna böhranının nizamlanması mövzusuna da xüsusi diqqət yetirəcəklər. Bu, hər iki dövlətin sözügedən istiqamətdəki cəhdləri, eyni zamanda Türkiyənin Ukrayna problemi üzrə sammitə və danışıqlara yenidən ev sahibliyi etmək barədə ardıcıl təklifləri ilə əlaqədardır.
Qeyd edək ki, Rusiya və Ukrayna nümayəndələrinin ilk görüşü 2022-ci ilin martında İstanbulda baş tutub, lakin əldə olunan razılaşmalar rəsmi Kiyevin təqsiri üzündən pozulub. Ötən il isə İstanbulda Rusiya və Ukrayna arasında birbaşa danışıqların üç mərhələsi keçirilib.
Qeyd edək ki, Tramp son 17 ildə Türkiyəyə səfər edən ilk ABŞ prezidenti olacaq. Bundan əvvəl Ankarada sonuncu dəfə Barak Obama 2009-cu ildə səfərdə olub.
