Avropa İttifaqında (Aİ) bir çoxu Kaya Kallasın Aİ-nin diplomatiya rəhbəri vəzifəsindəki fəaliyyətindən narazıdır, onu Rusiyaya həddindən artıq fokuslanmış hesab edənlər var.
Oxu.Az xəbər verir ki, bu barədə İspaniyanın "El Pais" qəzeti məlumat dərc edib.
Qəzetin yazdığına əsasən, bəzi diplomatlar Aİ qurumlarındakı vəziyyəti kinayə ilə "Taxt oyunları"na bənzədərək, Brüsseldə xarici siyasətə rəhbərlik uğrunda ciddi çəkişmələrin getdiyini vurğulayırlar. Nəşrin fikrincə, bu prosesdə Avropa Komissiyasının rəhbəri Ursula fon der Lyayen və Aİ-nin xarici işlər və təhlükəsizlik siyasəti üzrə ali nümayəndəsi Kaya Kallas arasında ziddiyyətlər daha da dərinləşib. Bu bürokratik qarşıdurmanın kökündə əslində Avropa diplomatiyasına tam nəzarət etmək üçün aparılan qlobal institusional savaş dayanır.
Məqalədə vurğulanır ki, bir çox nümayəndə Kallasın fəaliyyətini qənaətbəxş saymır. Nəşr qeyd edir ki, estoniyalı siyasətçini Rusiya mövzusuna həddindən artıq kökləndiyi üçün "monotematik" adlandıranlar mövcuddur. Bununla yanaşı, onun tez-tez səhvlər etdiyini düşünənlər də az deyil.
Həmçinin, Aİ-nin baş diplomatı İsrailə qarşı tutduğu mövqe və Yaxın Şərq prosesləri barədə yetərli bilgiyə sahib olmamasına görə də ciddi tənqid hədəfinə çevrilib.
Bunlardan başqa, qəzet Ursula fon der Lyayenin hakimiyyət "doymazlığına" dair şikayətlərin olduğunu da diqqətə çatdırır.
