“Boeing 737 MAX” qəzasına səbəb nə olub?

Efiopiyalı ekspertlər “Boeing 737 MAX” təyyarəsinin qəzaya uğramasına hava gəmisinin göyərtəsinin konstruksiya xüsusiyyətlərinin səbəb ola biləcəyini ehtimal edir.

Bu barədə “Bloomberg” məlumat yayıb.

Qəza ilə bağlı müvafiq sənədin martın 10-da açıqlanacağı gözlənilir.

Nəşr qeyd edir ki, İndoneziya tərəfi də öz növbəsində təyyarənin qəzaya uğramasına onun konstruksiyasının, zəif texniki qulluğun və pilotların fəaliyyətinin səbəb ola biləcəyini düşünür.

Xatırladaq ki, 2018-ci ilin noyabrında İndoneziyanın “Lion Air” şirkətinə məxsus “Boeing 737 MAX” təyyarəsinin qəzaya uğraması nəticəsində 189 nəfər həlak olub. 2019-cu ilin martında isə Efiopiyaya məxsus “Boeing 737 MAX” təyyarəsinin qəzaya düşməsi 157 nəfərin ölümünə səbəb olub.