Filippinin cənubunda yerləşən Mindanao adasında baş vermiş 7.8 maqnitudalı dəhşətli zəlzələ nəticəsində həlak olanların sayı 78 nəfərə çatıb.
Oxu.Az xəbər verir ki, bu barədə ölkənin rəsmi qurumları məlumat yayıblar.
Bildirilib ki, seysmik hadisə nəticəsində daha 1 339 nəfər müxtəlif dərəcəli bədən xəsarətləri alıb, 30 nəfər isə hələ də itkin düşmüş hesab olunur.
Dağıntılar altında qalanların xilas edilməsi üçün əməliyyatlar fasiləsiz davam etdirilir.
Zəlzələnin fəsadları 14 əyalət üzrə 1.4 milyondan çox insanın həyatına təsir göstərib. Yeraltı təkanlar səbəbindən təxminən 82 min sakin öz evlərini tərk etmək məcburiyyətində qalıb. Onların təxminən dörddə biri isə dövlət tərəfindən qurulmuş xüsusi təxliyə mərkəzlərində yerləşdirilib.
İlkin analitik məlumatlara əsasən, 770-dən çox vacib infrastruktur obyekti ciddi zədələnib. Ölkə iqtisadiyyatına dəyən maddi ziyanın məbləği indiyədək təqribən 2.4 milyon dollardır. Zəlzələnin baş verdiyi ərazilərdə elektrik enerjisi, içməli su təchizatı və rabitə xətlərinin fəaliyyətində yaranan kəsintilər xilasetmə işlərini daha da çətinləşdirir.
