Hindistanda Qyan Tivari adlı kişi qızının nikah fırıldağının qurbanı olduğunu bildirərək polisə müraciət edib.
Oxu.Az bu barədə "The Times of India" nəşrinə istinadən xəbər verir.
Məlumata görə, Tivarinin iddiasına əsasən, onun kürəkəni müxtəlif adlardan istifadə edərək təxminən 25 qadınla evlənib və onlardan külli miqdarda pul alıb.
Tivarinin qızı Praqya 2024-cü ildə Prakhar Trivedi ilə ailə qurub. İddialara görə, Prakhar evlilikdən əvvəl özünü Mumbaydan olan nüfuzlu daşınmaz əmlak biznesmeni kimi təqdim edib.
Təxminən iki il yarım sonra qızın ailəsi sosial şəbəkələrdə Prakharın mümkün fırıldaqları barədə məlumat aşkarlayıb. Qyan Tivarinin sözlərinə görə, kürəkəni Hindistanın müxtəlif ştatlarında qadınlarla saxta adlar altında tanış olub, onlarla münasibət qurub və daha sonra onlardan pul alıb.
Tivarinin iddiasına əsasən, Prakharın bu üsulla 25-ə yaxın nikah bağladığı ehtimal olunur.
Məlumatı əldə etdikdən sonra Tivari qızını öz evinə aparıb və ərinin ailəsi ilə bütün əlaqələri kəsib. O, hadisənin qızına və bütün ailəyə ciddi psixoloji zərər vurduğunu bildirib.
Qızın atasının müraciətindən sonra polis cinayət işi açıb və Prakhar Trivedi həbs edilib. İş üzrə araşdırma davam edir.
