İstanbulun Beşiktaş rayonunda baş vermiş terror hadisəsi zamanı ölənlərin sayı 38 nəfərə çatıb.
Oxu.Az APA-ya istinadən xəbər verir ki, bunu Türkiyənin daxili işlər naziri Süleyman Soylu bildirib.
S. Soylu deyib ki, şəhid olanlardan 31-i polis əməkdaşıdır. O, ölənlərdən birinin kimliyinin hələlik müəyyənləşmədiyini də qeyd edib.
Nazir qeyd edib ki, hazırda xəstəxanalarda 155 yaralı var, onlardan 14-nün vəziyyəti ağırdır.
S. Soylu hazırda 13 nəfərin şübhəli şəxs qismində saxlanıldığını da vurğulayıb: “İndiyə qədərki araşdırmalar hadisəni PKK terror təşkilatının törətdiyini göstərir”.
Nazir bu gün şəhid polislərdən bir neçəsinin dəfn mərasiminin keçiriləcəyini də qeyd edib.
06:00
Türkiyənin İstanbul şəhərində baş vermiş partlayışlarda 29 nəfər ölüb.
Oxu.Az Reporta istinadən xəbər verir ki, bu barədə ölkənin daxili işlər naziri Süleyman Soylu jurnalistlərə məlumat verib.
“Bu iki partlayışlarda millətimizə üzülərək və içimiz yanaraq bəyan edirik ki, hazırda 29 şəhidimiz var” – deyə nazir bildirib.
O, qeyd edib ki, ölənlərin böyük əksəriyyəti polis əməkdaşlarıdır.
Nazirin sözlərinə görə, hadisə zamanı 166 nəfər xəsarət alıb. Yaralılardan 23-nün vəziyyəti ağırdır. Hazırda onlar əməliyyat olunurlar.
Nazir həmçinin bildirib ki, hadisəni törətməkdə şübhəli bilinən 10 nəfər saxlanılıb. Səhiyyə Nazirliyi isə yaralılardan 3-nün vəziyyətinin kritik olduğunu bildirib.
Partlayışlardan biri bomba yüklü avtomobil, digəri isə kamikadze tərəfindən törədilib.
Qeyd edək ki, dünən axşam, yerli vaxtla saat 23:30 radələrində İstanbul şəhərinin Beşiktaş rayonunda dalbadal iki partlayış baş verib. Terror aktlarının əsas hədəfi polis əməkdaşları olub.
S.S.
www.oxu.az
