ABŞ-nin Kaliforniya ştatında evsiz kişi şərab mağazasından aldığı lotereya bileti ilə bir milyon dollar qazanıb.
Oxu.Az-ın xəbərinə görə, bu barədə "The Guardian" nəşri yazıb.
Adı açıqlanmayan qalib bileti uzun illər ərzində daimi müştərisi olduğu San-Luis-Obispodakı "Sandy's Deli-Liquor" mağazasından alıb.
"O, mağazaya gəldi, qoruyucu təbəqəni cızdı və dedi: "Aman Tanrım, bu həqiqətdir? Dostum, mən daha evsiz deyiləm!" Mən isə "Cek-potu vurdun" dedim", - deyə mağazanın meneceri Uilson Samaan danışıb.
Əvvəlcə kişi 100 min dollar qazandığını düşünüb, lakin Samaan mükafatın bir milyon dollar olduğunu təsdiqləyib.
Daha sonra Uilson Samaan maşını olmayan kişini Fresnoya aparıb ki, o, bileti poçtla göndərmək əvəzinə şəxsən təqdim etsin.
"Mən ona dedim ki, bu, milyon dollarlıq biletdir... Səni mən aparacağam", - deyə menecer qeyd edib.
Qalib nəşrə bildirib ki, qalibiyyət onun həyatını dəyişib və həmin pulu ilkin ödəniş üçün bu ərazidəki evə, eləcə də avtomobilin alınmasına istifadə etməyi planlaşdırır.
Sosial şəbəkələrdə yayımlanan videoda kişi qalib gəldiyini təsdiqləyib.
"Mən burada "Sandy's Deli-Liquor"da bir milyon dollar qazandım və bəli, küçədən çıxmaq üçün səbirsizlənirəm", - deyə o, təəssüratını bölüşüb.
Qeyd edək ki, kişi "Triple Red 777" ani uduş bileti ilə mükafatı qazanıb. "Kaliforniya Lotereyası"nın məlumatına görə, belə bir biletlə bir milyon dollar qazanma ehtimalı 2 047 423-də birdir.
