"Şimali Kipr sahillərində "Filo Jet" şirkətinə məxsus yüksək sürətli sərnişin gəmisinin batmasının qarşısını almaq mümkün idi".
Oxu.Az xəbər verir ki, yerli "Kıbrıs Postası" (KP) qəzetinin istintaqa istinadla yaydığı məlumata görə, gəmi Girnə limanını artıq zədəli halda tərk edib.
Məlumata görə, istintaqın ilkin qənaətinə əsasən, gəminin zədəsi olub, lakin buna baxmayaraq dənizə çıxıb. Zərərçəkənlərin ifadələri və videoçəkilişlər də bunu təsdiqləyir.
Qəzet əlavə edir ki, kapitan gəmini geri çevirərək aşağı sürətlə limana qayıtmaq imkanına malik olsa da, o, təhlükəyə məhəl qoymayıb və bunu etməyib. Bildirilir ki, bərəyə su dolmağa başlayan kimi kapitan dərhal gəminin istiqamətini dəyişdirib yavaş sürətlə Girnəyə qayıtsaydı, faciə yaşanmazdı. Lakin o, sürəti azaltmaq əvəzinə hərəkətə davam edib.
Məlumata əsasən, cümə axşamı məhkəmə insanların ölümü ilə nəticələnən cinayət işi üzrə doqquz təqsirləndirilən şəxsin həbs müddətini daha səkkiz gün uzadıb. Bərənin kapitanı da həbs edilənlər arasındadır. Bildirilir ki, məhkəməyə daxil olan məlumatlara görə, kapitan öz vəsiqəsini 3.5 min dollara Hondurasdan alıb və daha sonra həmin sənədi Yunanıstanda qeydiyyatdan keçirib.
Xatırladaq ki, avqustun 30-da göyərtəsində 260-a yaxın sərnişin və səkkiz heyət üzvü olan gəmi Kiprdən 2.5 kilometr məsafədə dənizdə batıb. Faciə nəticəsində doqquz nəfər həyatını itirib, daha 19 nəfər isə hələ də itkin düşmüş hesab olunur.
