Avropa ölkələrinin rəhbərləri Ukrayna münaqişəsinin həlli üçün ABŞ-nin təklifləri ilə müqayisədə Kiyevə daha əlverişli alternativ plan üzərində işləyirlər.
Oxu.Az xəbər verir ki, bu barədə "The Wall Street Journal" nəşri yazıb.
Nəşrə görə, Avropa liderləri öz layihələrini yaxın günlərdə təqdim etməyi planlaşdırırlar. Bununla belə, Kiyev hələlik bu planda iştirak etməyə razılıq verməyib. Planın təfərrüatı açıqlanmır.
Daha əvvəl Ağ Evin mətbuat katibi Kerolayn Livitt bildirib ki, ABŞ-nin dövlət katibi Marko Rubio və ABŞ prezidentinin xüsusi nümayəndəsi Stiven Uitkoff Vaşinqtonun təklif etdiyi nizamlama planı ilə bağlı həm Rusiya, həm də Ukrayna ilə əlaqə saxlayırlar.
Qərb mediası yazır ki, ABŞ-nin təklifləri Birləşmiş Ştatlar tərəfindən təhlükəsizlik zəmanətlərinin verilməsi müqabilində Kiyevin bəzi ərazilərdən imtina etməsini nəzərdə tutur.
