Bazar ertəsi Kolumbiyada baş vermiş dağıdıcı zəlzələnin ardınca ən azı yeddi afterşok qeydə alınıb.
Oxu.Az xəbər verir ki, bu barədə məlumat ölkənin Geoloji Xidmətinin "X" sosial şəbəkəsindəki səhifəsində paylaşılıb.
Yeraltı təkanların əksəriyyətinin maqnitudası 3-3.6 aralığında dəyişib, zəlzələ ocaqları isə Latın Amerikası ölkəsinin cənub-qərbində yerləşib. Hazırda xilasedicilər itkin düşənlərin axtarışlarını davam etdirirlər, xəsarət alanlara isə lazımi tibbi yardım göstərilir.
Kolumbiyanın Milli Birləşmiş Enerji Sisteminin operatoru ölkənin bir sıra regionlarında elektrik enerjisinin verilişində qismən fasilələrin yarandığını bildirib. Ən ciddi problemlər Çoko departamentində qeydə alınıb və burada elektrik təchizatının təxminən 60%-i kəsilib.
Xatırladaq ki, avqustun 10-da Çoko departamentinin San-Xose-del-Palmar şəhəri yaxınlığında 7.4 maqnitudalı zəlzələ baş verib. Təbii fəlakət nəticəsində ən azı 169 nəfər həyatını itirib.
