İraq və Pakistanın Fars körfəzi vasitəsilə mayeləşdirilmiş təbii qaz (LNG) və neft nəqli ilə bağlı İranla yeni müqavilələr bağladıqları bildirilir.
Oxu.Az xəbər verir ki, bu barədə "Reuters" məlumat yayıb.
Qeyd olunub ki, sözügedən sazişlər Tehranın Hörmüz boğazı üzərindən enerji axınlarına təsir imkanlarını artıracaq, həmçinin Fars körfəzindən LNG və neft tədarükünü əhatə edəcək.
Bildirilir ki, Yaxın Şərqdəki gərginliklər regiondan enerji daşıyıcılarının ixracını əhəmiyyətli dərəcədə aşağı salıb. İran qlobal miqyasda LNG və neft dövriyyəsinin təqribən 20 faizinin keçdiyi strateji ölkələrdən biri kimi tanınır.
İraqın neft ixracatının mütləq əksəriyyəti Hörmüz boğazından daşındığı üçün dəhliz bağlanacağı halda bu ölkəyə ciddi iqtisadi zərbə dəyə bilər. Bununla yanaşı enerji idxalından güclü asılılığı olan Pakistanda yanacağın qiymətində kəskin bahalaşma qeydə alınmaqdadır.
Verilən xəbərlərə görə, Tehran və Bağdad arasında əvvəlcədən elan edilməyən gizli sazişə əsasən, İraqa məxsus iki nəhəng neft tankeri artıq boğazdan uğurla keçib. İraqın Neft Nazirliyi də öz növbəsində tranzit tutumunun genişləndirilməsi ilə bağlı müzakirələrin getdiyini təsdiq edib.
Eyni zamanda, Qətərdən mayeləşdirilmiş təbii qaz daşıyan daha iki tankerin Pakistan istiqamətində yola düşdüyü bildirilir. Bu addım İran və Pakistan arasında imzalanmış ikitərəfli enerji sənədinin bir hissəsi kimi xarakterizə edilir.
