ABŞ-nin Kaliforniya ştatına daxil olan San-Dieqo şəhərinin Sorrento Valley ərazisində qısa zaman kəsiyində sürətlə yayılaraq 50 hektardan çox sahəni əhatə edən şiddətli meşə yanğını qeydə alınıb.
Oxu.Az xəbər verir ki, bu barədə yerli "Times of San Diego" nəşri məlumat yayıb.
Bildirilir ki, bazar günü Sorrento Valley bölgəsində başlayan və 90 dəqiqə ərzində sürətlə böyüyən meşə yanğını əhalinin təxliyəsinə səbəb olub. Yanğın 131 akr (təqribən 53 hektar) ərazini əhatə edib və hazırda onun 15%-i lokallaşdırılıb.
Yanğınsöndürənlər dərhal havadan müdaxiləyə başlayıblar, yerüstü briqadalar isə binaların mühafizəsi üçün hazırlıq görüblər, çünki alov yaşayış evləri ilə əhatə olunmuş kanyonda tüğyan edir.
Bir saat ərzində xilasetmə əməliyyatının miqyası daha da böyüyüb: hadisə yerinə dörd yanğınsöndürən avtomobil, meşə yanğınlarının söndürülməsi üçün yeddi xüsusi maşın, iki helikopter, "Cal Fire" təyyarələri, iki buldozer və çevik reaksiya qrupu cəlb olunub. San-Dieqo polisi isə ətraf küçələrin bağlanmasını təmin edib.
