Həbsdə olan müxalif Qaqik Sarukyana məxsus "Ararat" konyak-şərab-araq kombinatının direktoru cümə günü saxlanılıb.
Oxu.Az bu barədə "Armenpress" agentliyinə istinadən xəbər verir.
Ermənistan İstintaq Komitəsinin Mətbuat Xidmətindən bildirilib ki, "Noy" brendi altında məhsul istehsal edən İrəvan konyak-şərab-araq kombinatının direktoru Arman Davtyan xüsusilə külli miqdarda vergidən yayınmaqda ittiham olunaraq saxlanılıb.
Xatırladaq ki, iyulun 7-də İrəvan məhkəməsi Qaqik Sarukyan barəsində iki aylıq həbs qətimkan tədbiri seçib. Ermənistan İstintaq Komitəsinin məlumatına görə, Sarukyanın rəhbərlik etdiyi qrup 2022-2024-cü illərdə irimiqyaslı dələduzluq və xüsusilə külli miqdarda çirkli pulların yuyulmasında şübhəli bilinir. İstintaqın versiyasına əsasən, həmin şəxslər Ermənistana nəqliyyat vasitələri, texnika və yanacaq idxalı ilə məşğul olan bir sıra şirkətləri İran vətəndaşlarının adına rəsmiləşdirərək onların 22 milyon ABŞ dollarından çox vəsaitini mənimsəyiblər.
Bundan əlavə, iyulun 16-da Ermənistan Baş Prokurorluğu Sarukyana məxsus "Araratsement" zavodunun Antikorrupsiya Məhkəməsinin qərarı ilə dövlətin idarəçiliyinə verildiyini açıqlayıb.
Həmçinin Sarukyana məxsus "Multi Velnes" idman-sağlamlıq kompleksi İrəvan meriyasına təhvil verilib. Ona məxsus "Arinc Moll" ticarət kompleksi isə Dövlət Gəlirləri Komitəsinin əməkdaşları tərəfindən möhürlənib.
