Populyar ABŞ ifaçısı Stiv Uonder öz çıxışlarını dayandırmaq fikrində deyil və ömrünün sonuna qədər səhnədə qalmaq niyyətindədir.
Oxu.Az xəbər verir ki, o, bu barədə "Sidetracked" podkastına danışıb.
Bir çox həmkarının yaşla bağlı qastrol proqramlarını azaltmasına baxmayaraq, Stiv dayanmaq üçün heç bir səbəb görmür.
"Nəfəs aldığınız müddətcə və ürəyiniz döyündükcə, deyəcək bir sözünüz var. İçimdə yanmağa davam edən bu işıqdan əl çəkməyəcəyəm. Sənətkar təxəyyül edə bildiyi müddətcə yaradıcılığını heç vaxt dayandırmaz", - deyə musiqiçi əlavə edib.
Uonder həmçinin təsdiqləyib ki, o, 2008-ci ildə elan etdiyi "Through the Eyes of Wonder" adlı son 20 ildəki ilk albomu üzərində işləyir. Layihə onun görmə məhdudiyyətli bir insan kimi yaşama təcrübəsini əks etdirir və performans əsəri kimi nəzərdə tutulub.
