Tailand 60 günlük vizasız giriş rejiminə son qoyan qaydaları rəsmi şəkildə dərc edib.
Oxu.Az xəbər verir ki, 2026-cı il sentyabrın 15-dən etibarən ABŞ, Böyük Britaniya, Kanada və Avstraliya da daxil olmaqla, 60 ölkə və ərazinin vətəndaşlarına Tailandda vizasız maksimum 30 gün qalmağa icazə veriləcək.
Hazırkı qaydalar sentyabrın 14-dək qüvvədə qalacaq, yeni müddəalar isə 2026-cı il sentyabrın 15-dən tətbiq ediləcək.
Hazırkı rejim çərçivəsində uyğun ölkələrin vətəndaşları turizm, bəzi qısamüddətli iş fəaliyyəti və biznes məqsədləri üçün Tailanda daxil olaraq ilkin olaraq 60 günədək qala bilirlər.
Yeni qaydalarda, həmçinin vizasız girişin turizm məqsədləri ilə məhdudlaşdırıldığı xüsusi olaraq qeyd olunur.
30 günlük vizasız giriş hüququ olan səyahətçilər əlavə olaraq birdəfəlik, maksimum 30 günlük müddətin uzadılması üçün müraciət edə biləcəklər. Bunun təsdiqi Tailandın immiqrasiya orqanlarının qərarından asılı olacaq.
İslahat Tailanda daxil olarkən "Visa on Arrival" (ölkəyə gəldikdən sonra alınan viza) əldə edə biləcək səyahətçilərin sayını da kəskin şəkildə azaldacaq. Yeni qaydalar "Visa on Arrival" hüququna malik ölkələrin siyahısını rəsmi olaraq üç ölkə ilə məhdudlaşdırır: Azərbaycan, Belarus və Serbiya.
Müqayisə üçün qeyd edək ki, hazırda qüvvədə olan rejim 31 ölkə və ərazinin vətəndaşlarına "Visa on Arrival" almağa imkan verir.
