Avropa Komissiyası (AK) "TikTok"u Rəqəmsal Xidmətlər Aktında (Digital Services Act - DSA) nəzərdə tutulan uşaqların onlayn mühitdə qorunması ilə bağlı Avropa İttifaqı (Aİ) qaydalarını pozmaqda ittiham edib.
Oxu.Az xəbər verir ki, bu barədə qurumun rəsmi saytında məlumat yayımlanıb.
Məlumatda bildirilir ki, platformada azyaşlı istifadəçilərin hesab tənzimləmələri kifayət qədər təhlükəsizlik səviyyəsini təmin etmir. Xüsusilə, uşaqların profillərini açıq rejimdə saxlaması onların kiberbullinqə və arzuolunmaz əlaqələrə məruz qalması riskini artırır.
Avropa Komissiyası həmçinin qeyd edib ki, hətta qapalı hesablar belə digər istifadəçilərin izləyicilər və izlənilənlər siyahıları vasitəsilə axtarış üçün əlçatan ola bilər.
Tənzimləyici qurum "TikTok"dan yeniyetmələrin açıq hesabları ilə bağlı təhlükəsizlik tənzimləmələrini dəyişməyi tələb edib. Belə ki, onların paylaşımlarını yalnız özlərinin təsdiqlədiyi istifadəçilər görə bilməlidir.
Qeyd olunub ki, pozuntular təsdiqlənərsə, şirkət illik qlobal dövriyyəsinin 6 faizinə qədər cərimələnə bilər.
"TikTok" isə AK-nin qənaətlərini araşdıracağını və Avropa hakimiyyət orqanları ilə əməkdaşlığı davam etdirəcəyini bildirib. Şirkət vurğulayıb ki, 18 yaşdan kiçik istifadəçilərin hesabları standart olaraq qapalı rejimdə yaradılır və onlar əlavə təhlükəsizlik funksiyaları ilə təmin edilir.
Bu, son iki il ərzində Avropa İttifaqında "TikTok"a qarşı qaldırılan dördüncü araşdırmadır. Bundan əlavə, Böyük Britaniyanın media tənzimləyicisi "Ofcom" da uşaqların zərərli məzmundan qorunması və istifadəçilərin yaşının müəyyənləşdirilməsi sistemlərinin etibarlılığı ilə bağlı mümkün problemlərə görə platformaya qarşı araşdırmaya başlayıb.
