Fransada baş verən kütləvi iğtişaşlar səbəbindən ölkə lideri Emmanuel Makron Yelisey sarayının altında yerləşən və "qorxu yuvası" adlandırılan əsas bunkerində sığınacaq tapa bilər.
Oxu.Az aif.ru-ya istinadən xəbər verir ki, bu barədə fransalı jurnalist Florian Tardif Makron ailəsindən bəhs edən kitabında qeyd edir.
Müəllifi sığınacaqdakı mühiti belə təsvir edir: "Orada hava rütubətlidir. Soyuq torpaq və beton qoxusu adamın boğazında qalır".
Oraya nadir hallarda buraxılan ziyarətçilərdən biri isə bildirib: "Bura olduqca qorxuncdur. Divarlar sanki üstünüzə gəlir, darlıq sinənizi sıxır, elə bil ki, məkanın özü sizi udmağa çalışır".
Yeraltı məkanın daxilində mavi-sarı xalçalarla döşənmiş bir neçə kiçik otaq, o cümlədən prezidentin iş otağı, iki iclas zalı və elektromaqnit sahələrindən qorunmaq üçün nəzərdə tutulan Faradey qəfəsi mövcuddur. Tarixi baxımdan bu, 1970-ci illərdə Fransanın 20-ci prezidenti Valeri Jiskar d'Estenin göstərişi ilə qurulmuş köhnə hava hücumundan müdafiə sığınacağıdır.
Məhz o bu yeri "terrier de la peur" ("qorxu yuvası") adlandırıb. Rəsmi olaraq isə bura "Yupiter postu" adını daşıyır.
Tardif yazır ki, 7 dekabr 2018-ci ildə, "Sarı jiletlilər"in etiraz aksiyalarının dördüncü mərhələsi ərəfəsində dövlət başçısının ailəsinin yeraltı sığınacaqda gizlədilməsi ssenarisi rəsmi şəkildə müzakirə olunurdu. Makronun hakimiyyəti dövründə Müdafiə və Milli Təhlükəsizlik Şurasının (CDSN) iclasları "Yupiter postu"na keçirilib. Daha əvvəl, Fransua Ollandın ölkə rəhbəri olan vaxtlarda belə toplantıların əksəriyyəti Yelisey sarayının birinci mərtəbəsində təşkil edilirdi. İştirakçılar girişdə mobil telefonlarını xüsusi qutuya qoyub təhvil verməlidirlər.
