Paytaxtın Xətai rayonunda çoxmərtəbəli yaşayış binasında baş verən yanğın hadisəsinin detalları məlum olub.
Yanğına mənzildə yaşayan bacı-qardaş arasında baş verən mübahisənin səbəb olduğu iddia edilir.
Oxu.Az xəbər verir ki, bu barədə Baku TV-nin videomaterialında deyilir.
Məlumata görə, yanğın nəticəsində mənzilə ciddi ziyan dəyib, alovun digər mənzillərə keçmə təhlükəsi yaranıb. Hadisə yerinə Fövqəladə Hallar Nazirliyinin əməkdaşları, polis və təcili tibbi yardım briqadaları cəlb olunub.
Sakinlərin sözlərinə görə, hadisədən əvvəl mənzildə yaşayan şəxslər arasında mübahisə baş verib. Onlardan biri bildirib ki, əvvəlcə mənzildən yüksək səslər eşidilib, daha sonra isə şəxsin əlində baltaya bənzər alətlə şüşələri sındırdığı görülüb.
Şahidlərdən biri deyib ki, həmin şəxs daha sonra mənzildəki əşyaları, o cümlədən paltarları qaz plitəsinin üzərinə yığıb və yanğın başlayıb. Onun sözlərinə görə, şəxs daha sonra balkona çıxıb və huşunu itirib. Həmin şəxsə ilkin tibbi yardım göstərilib və daha sonra təcili tibbi yardım avtomobili ilə xəstəxanaya aparılıb.
Digər bir sakin bildirib ki, binada üç ildən artıqdır yaşayır və həmin mənzildə yaşayanlarla bağlı əvvəllər ciddi mübahisə eşitməyib:
"Üç ildən çoxdur burada yaşayıram. Heç vaxt mübahisə eşitməmişəm, dava-filan olmayıb. Normal qonşu olmuşuq".
Sakinlərin sözlərinə görə, mənzildə yaşlı kişi və həyat yoldaşı ilə yanaşı, ailənin digər üzvləri də yaşayıb. Hadisə zamanı binanın sakinləri mənzildən aşağı müxtəlif əşyaların atıldığını da görüblər.
Hadisənin dəqiq səbəbləri və yanğının hansı şəraitdə baş verməsi araşdırılır.
Paytaxtın Xətai rayonunda hündürmərtəbəli yaşayış binasında yanğın baş verib.
Oxu.Az APA-ya istinadla xəbər verir ki, hadisə Məhəmməd Hadi küçəsi 72 ünvanında yerləşən yaşayış binasının üçüncü mərtəbəsində qeydə alınıb.
Yanğının həmin ünvanda yaşayan şəxslər arasında şəxsi münaqişə zəminində törədildiyi bildirilir.
Hadisə yerinə Fövqəladə Hallar Nazirliyinin əməkdaşları, polis və təcili tibbi yardım briqadaları cəlb olunublar.
Yanğın söndürülüb və alovun qonşu mənzillərə keçməsinin qarşısı alınıb.
Faktla bağlı araşdırma aparılır.
