"Hazırda binaların ümumi sahələrində aparılan təmir-bərpa işləri səbəbindən siqnalizasiya detektorlarının üzərinə standart tozəleyhinə qoruyucu örtüklər quraşdırılıb".
Bu barədə Oxu.Az-ın sorğusuna cavab olaraq "Melissa Group"dan məlumat verilib.
Bildirilib ki, qeyd olunan binalarda (G1, G2, G3, F1, F2, H1, H2) yanğın siqnalizasiya sistemi tam şəkildə işlək vəziyyətdədir və bu sistemlər dayandırılmayıb.
"Bu örtüklər beynəlxalq təcrübədə geniş istifadə olunur və onların əsas funksiyası yüksək həssaslığa malik detektorların toz, boya və digər tikinti hissəciklərindən qorunması, cihazların düzgün işləmə qabiliyyətinin saxlanılması, təmir prosesinin siqnalizasiya sisteminin fəaliyyətinə təsir etməməsinin təmin edilməsidir. Qoruyucu örtüklər detektorun işini deaktiv etmir, detektorların indikator işıqları daxili korpusda aktiv şəkildə işləyir, bütün sistem mərkəzi panelə real vaxtda siqnal ötürür və tam nəzarət altındadır.
Təmir işləri tamamlandıqdan sonra bütün qoruyucu örtüklər texniki heyət tərəfindən ardıcıllıqla çıxarılacaq və girişlər tam vizual şəkildə ilkin görünüşünə qaytarılacaqdır. "Melissa Group" olaraq sakinlərə bir daha bildiririk ki, hazırda yanğın təhlükəsizliyi ilə bağlı heç bir risk yoxdur. Sistemlər fasiləsiz monitorinqdədir və normativ tələblərə uyğun şəkildə fəaliyyət göstərir", - deyə məlumatda qeyd olunub.
"Melissa Group" tikinti şirkətinin inşa etdiyi yaşayış kompleksi ilə bağlı redaksiyamıza şikayət daxil olub.
Oxu.Az-a kompleksdəki sakinlərin verdiyi məlumata görə, bütün binalarda və girişlərdə yanğın siqnalizasiya sistemi işlək deyil.
Qeyd olunur ki, G1, G3, F1, F2, H1 və H2 girişləri yoxlanılıb və sistemin işlək vəziyyətdə olmadığı üzə çıxıb.
İddia olunur ki, yanğın detektorlarının üzərini mavi plastik qapaqlarla örtüblər.
"Bu qapaqlar detektorun normal işləməsinə mane olur və quraşdırılması ümumiyyətlə qadağandır. Bundan əlavə, detektorların indikator işıqları yanmır, bu isə təkcə o cihazın yox, ümumiyyətlə bütün sistemin söndürülmüş olduğunu göstərir. Sistem bütün binada aktiv olmadığı üçün mənzillərə quraşdırılan detektorlar da işə düşmür. Kompleksin işçisi də sistemin qoşulu olmadığını etiraf edib. Bu, yüzlərlə insanın həyatını real təhlükə altına qoyur", - deyə şikayətdə qeyd olunub.
Qeyd edək ki, məsələ ilə bağlı "Melissa Group" tikinti şirkətinə sorğu ünvanlanıb.
Aqil Vəlili
