Şəkidə 85 yaşlı kişinin evində yanaraq həyatını itirməsinin bəzi detalları məlum olub.
Oxu.Az-ın məlumatına görə, hadisə gecə saat iki radələrində rayonun Bideyiz kəndində baş verib .
Kənd sakini, 85 yaşlı Əli Saat oğlu Xasiyevin iki övladı olsa da, evində tək yaşayırmış. Onun bir oğlu Bakıda, digər oğlu isə elə həmin kənddə yaşayırmış. Amma Ə.Xasiyev özünə məxsus evdə tək qalırmış. O, həmçinin son vaxtlar yeriməkdə də çətinlik çəkirmiş.
Ə.Xasiyevin evinə qaz xətti çəkilsə də, o, odun peçindən istifadə edib. Hadisənin də məhz odun peçindən qaynaqlandığı bildirilir. Belə ki, gecə saatlarında odun peçindən baş verən yanğını Ə.Xasiyev söndürə bilməyib. Nəticədə ev tamamilə alışıb və o, yanaraq ölüb.
Faktla bağlı araşdırma aparılır.
Samir Əli
Şəki rayonunda yanğın baş verib.
Oxu.Az xəbər verir ki, hadisə rayonun Bideyiz kəndində, kənd sakini 85 yaşlı Əli Xasiyevə məxsus evdə qeydə alınıb.
Belə ki, ümumi sahəsi 100 m² olan kürsülü birmərtəbəli iki otaq və eyvandan ibarət olan fərdi yaşayış evində qəfil yanğın başlayıb. Hadisə yerinə Fövqəladə Hallar Nazirliyinin müvafiq qüvvələri cəlb olunublar.
Hadisə nəticəsində evin yanar konstruksiyaları ev əşyaları ilə birlikdə tamamilə yanıb.
Yanğından sonra keçirilən baxış zamanı ev sahibi Ə.Xasiyevin yanmış meyiti aşkar olunub.
Faktla bağlı araşdırma aparılır.
Əli Məmmədov
