"Ölkə başçımız cənab Ali Baş Komandan İlham Əliyev əlimi sıxıb həm qapıçısan, həm də qol vurmusan deyəndə, qürur hissləri keçirdim".
Bunu Oxu.Az-a açıqlamasında Azərbaycanın minifutbol üzrə millisinin qapıçısı Ağaseyid Qasımov deyib.
"Dünya çempionu olduğumuz üçün çox sevincli və sözlə ifadə edə bilməyəcəyim dərəcədə qürurluyuq. Bundan sonra da qələbələr qazanmağa və çempion olmağa çalışacağıq. Dünya çempionu olmaq bir yana ölkə başçımız cənab Ali Baş Komandan İlham Əliyevin bizi qəbuluna çağırması əvəzolunmaz hissdir. Mənimlə görüşərkən, həm qapıçısan, həm də qol vurmusan dedi. Çox sevincli haldır ki, ölkə başçısı bizim oyunlarımızı izləyib. Bizi aşağı çəkməyə çalışan insanları bizdən saymıram. Qələbəmizə sevinən hər kəsə isə minnətdaram", - deyə A.Qasımov bildirib.
Xatırladaq ki, Elşad Quliyevin rəhbərlik etdiyi Azərbaycan millisi minifutbol üzrə dünya çempionatının final matçında Macarıstan yığmasını məğlub edib. İyunun 1-də Milli Gimnastika Arenasında keçirilən qarşılaşma yığmanın 4:2 hesablı qələbəsi ilə yekunlaşıb.
Anar Həsənov
