İngiltərə Premyer Liqası: "Tottenhem" - "Çelsi" oyununda qol yağışı

İngiltərə Premyer Liqasının 15-ci turunun "Tottenhem" və "Çelsi" komandalarının qarşılaşması başa çatıb.

Oxu.Az xəbər verir ki, oyun Londonda (İngiltərə) "Tottenhem Hotspur" stadionunda baş tutub. Qarşılaşma 3:4 hesabı ilə qonaq "Çelsi"nin xeyrinə başa çatıb.

Hesab artıq beşinci dəqiqədə açılıb, "Tottenhem"in hücumçusu Dominik Solanke fərqlənib. 11-ci dəqiqədə Deyan Kuluşevski fərqi ikiyə çatdırıb. 17-ci dəqiqədə "Çelsi"nin heyətində Ceydon Sanço qollardan birinin əvəzini çıxıb. 61-ci dəqiqədə Koul Palmer penaltini dəqiq yerinə yetirərək hesabı bərabərləşdirib. 73-cü dəqiqədə "Çelsi"nin yarımmüdafiəçisi Enzo Fernandes komandasını hesabda irəli çıxarıb. 84-cü dəqiqədə Koul Palmer ikinci penalti ilə dubl edib. 90+6-cı dəqiqədə "Tottenhem"li Son Hın Min oyunda son qolu vurub.

"Tottenhem Hotspur" hazırda İngiltərə Premyer Liqasının turnir cədvəlində 11-ci yerdədir. Komanda 15 görüşdə 20 xal toplayıb. "Çelsi" 31 xal toplayıb və ikinci yerdə qərarlaşıb. "Liverpul" 14 oyundan sonra 35 xalla birinci yerdədir.