"Bugünkü nəticəyə baxmayaraq, yaxşı oyun nümayiş etdirdik. Artıq "Neftçi"nin "Qarabağ" və "Sabah" kimi komandalarla qarşılaşmalarda özünü zəif tərəf kimi gördüyünü demək olmaz. Əvvəllər "Qarabağ"a böyük hesabla məğlub olduğumuz oyunlar olub. İndi isə rəqiblərimizdən çəkinmirik".
Oxu.Az xəbər verir ki, bunu "Neftçi"nin baş məşqçisi Yuri Vernidub Misli Premyer Liqasının VIII turunda "Qarabağ"la 3:3 hesablı heç-heçə ilə başa çatan oyundan sonra keçirilən mətbuat konfransında deyib.
Mütəxəssis komandasının çıxışından razı qaldığını, lakin qələbəni əldən verdikləri üçün məyus olduğunu bildirib.
"Qarabağ" və "Neftçi" Azərbaycan çempionatında 1 000 oyun keçirən iki klubdur. Bu, çox şeydən xəbər verir. Düşünürəm ki, düzgün yoldayıq və "Neftçi"ni daha güclü komandaya çevirmək üçün işləməyə davam edəcəyik. Hədəfimiz həmişə turnir cədvəlinin zirvəsində olmaqdır.
Çempionatın dörddəbir hissəsi geridə qalıb və qarşıda bizi daha 25 oyun gözləyir. Mövsümün sonunda hansı nəticəyə nail olacağımızı növbəti matçlar göstərəcək. Düzgün istiqamətdə irəliləsək, məqsədimizə çata bilərik.
Açıq deyim ki, son iki oyunda dörd xal itirmişik. Xüsusilə bugünkü matçda qələbəni əldən verməyimizə təəssüflənirəm.
İstəyirəm ki, "Neftçi" meydanda futbol oynasın, vaxtı uzatmağa çalışmasın. Futbolçularımızın yerdə uzanaraq vaxt keçirməsini deyil, oyunu davam etdirməsini istəyirəm. Biz bu yolu seçmişik.
Başqalarını günahlandırmaq əvəzinə, öz oyunumuzu təhlil etməli, səhvlərimizdən nəticə çıxarmalı və irəli getməliyik. Bu prinsiplərə sadiq qalsaq, daha güclü komandaya çevriləcəyik.
Müdafiədə buraxdığımız səhvləri və oyunun son dəqiqələrindəki çıxışımızı isə təhlildən sonra daha dəqiq qiymətləndirə bilərik. İndi sakitləşmək, matçı yenidən izləmək və lazımi nəticələr çıxarmaq lazımdır", - deyə Yuri Vernidub vurğulayıb.
Qeyd edək ki, heç-heçədən sonra "Neftçi" 17 xalla turnir cədvəlinin ikinci pilləsində, eyni xala malik "Qarabağ" isə üçüncü yerdə qərarlaşıb.
