Şotlandiya nəhəngi "Seltik"in baş məşqçisi Martin O'Nil "Qarabağ"ın istedadlı futbolçusu Kamilo Duranın transferinə çox yaxın olduqlarını rəsmən təsdiqləyib.
Oxu.Az xəbər verir ki, təcrübəli mütəxəssis klubun rəsmi televiziyasına müsahibəsində kolumbiyalı hücumameyilli yarımmüdafiəçinin artıq tibbi baxışdan keçdiyini vurğulayıb.
Martin O'Nil 24 yaşlı cinah oyunçusunun qısa zamanda əsas komandaya cəlb olunacağını diqqətə çatdırıb:
"O, kifayət qədər gənc oyunçudur. İnanıram ki, meydanda uğurlu çıxış edəcək. Duran öz mövqeyində olduqca güclü və potensiallıdır".
Şotlandiya mediasında yayılan məlumata görə, müqavilə 3+1 şərti ilə imzalanacaq.
Qeyd edək ki, Kamilo Duranın "Qarabağ"a 6.4 milyon avro gəlir qazandıracağı ehtimal olunur.
Xatırladaq ki, Kamilo Duran "Qarabağ"ın heyətinə ötən ilin yay transfer pəncərəsində Portuqaliyanın "Portimonense" klubundan cəlb edilmişdi. Kolumbiyalı hücumçu Ağdam təmsilçisinin forması ilə çıxdığı bütün turnirlərdə ümumilikdə 48 matçda 15 qol və 10 məhsuldar ötürmə ilə diqqət mərkəzinə düşüb.
O, eyni zamanda UEFA Çempionlar Liqası çərçivəsində keçirdiyi 10 qarşılaşmada 5 dəfə rəqib qapılarına yol tapmağı bacarıb.
