"Alibaba Cloud"un süni intellekti "DeepSeek"i üstələdi

Çinin "Aliyun" kimi də tanınan "Alibaba Cloud" texnologiya nəhəngi süni intellekt sahəsində yeni "Qwen2.5-Max" modelini təqdim edib. İddiaya görə, bu sistem "DeepSeek" və "Meta AI"nin "Llama" kimi qabaqcıl işləmələrini öz xüsusiyyətlərinə görə üstələyir.

Oxu.Az-ın verdiyi məlumata görə, bu barədə "WeChat"dakı rəsmi kanalda xəbər yayılıb.

"Alibaba Cloud" komandası "Qwen2.5-Max"ı "DeepSeek-V3" və "Llama-3.1-405B" modelləri ilə müqayisə edən 11 test seriyası keçirib.

Nəticələr göstərib ki, Çin şirkətinin yeni işləməsi bütün sınaqlarda rəqiblərini üstələyib və son dərəcə güclü kompleks xüsusiyyətlər nümayiş etdirib.

Xatırladaq ki, Çinin "DeepSeek" şirkəti yanvarın 20-də ABŞ-nin "OpenAI" şirkətinin "ChatGPT" versiyasından üstün olduğu iddia edilən çat-botun yeni "R1" versiyasını buraxıb. Ekspertlər qeyd ediblər ki, Çin çat-botunun tərtibatçıları "OpenAI"dən xeyli az vəsait xərcləyiblər. Bazarların "DeepSeek-R1"in meydana çıxmasına reaksiyası kəskin olub. ABŞ-nin "Nasdaq" texnologiya indeksi 3%-dən çox enib, "OpenAI" üçün bahalı çiplərlə təchiz edən "NVidia" şirkətinin səhmləri isə 16.86% aşağı düşüb.