"Süni intellektin yaratdığı ən yeni və ən mürəkkəb təhdid növünə də mütləq toxunmalıyıq. Bunlar "deepfake" adlandırılan dərin saxta məzmun və sintetik mediadır".
Oxu.Az xəbər verir ki, bunu Milli Məclisinin Xarici müdaxilələrə və hibrid təhdidlərə qarşı müvəqqəti komissiyasının "Rəqəmsal inkişaf, süni intellekt və uşaqların sosial şəbəkə platformalarındakı zərərli təsirlərdən qorunması" mövzusunda keçirilən ictimai dinləmədə komissiyanın sədri, deputat Ramid Namazov deyib.
Onun sözlərinə görə, süni intellekt həlləri artıq elə realistik, tam funksionallı saxta audio, video və görüntü materialları yarada bilir ki, bunların yayılma sürəti müvafiq dövlət qurumlarının və ya faktyoxlama mexanizmlərinin reaksiya vermə qabiliyyətini bəzən üstələyə bilir:
"Bu, sadəcə maraqlı bir texnoloji fenomen deyil. Bu fəaliyyətlər müasir hibrid təhdidlərin ən çevik və ən çətin izlənilən alətlərindən birinə çevrilib. "Deepfake" və süni intellekt əsaslı dezinformasiya artıq ənənəvi kiberhücumlarla yanaşı, hibrid təhdid arsenalının tərkib hissəsi kimi qiymətləndirilməlidir. Onlardan həm ictimai etimadı sarsıtmaq, həm dövlət institutlarının nüfuzuna xələl gətirmək, həm də fərdləri, uşaqları aldatmaq və manipulyasiya etmək üçün istifadə oluna bilər. Bəlkə də dezinformasiya və süni intellektlə bağlı riskləri ayrıca təhdid kateqoriyası kimi nəzərdən keçirmək olar. Fəaliyyət Planında nəzərdə tutulan, qadağan olunmuş məzmunun süni intellekt vasitəsilə avtomatik aşkarlanması sistemləri də əslində məhz bu yeni nəsil təhdidlərə cavab vermək üçün nəzərdə tutulub".
