Gələn ilin dövlət büdcəsində dövlət sifarişi və dövlət hesabına kadr hazırlığının maliyyələşdirilməsi üçün 41,8 milyon manat vəsait ayrılması planlaşdırılır.
Oxu.Az xəbər verir ki, bu, "Azərbaycan Respublikasının 2026-cı il dövlət büdcəsi haqqında" qanun layihəsində öz əksini tapıb.
Bu vəsait 18.5 min nəfər güzəştli kateqoriyaya aid tələbənin təhsil və təqaüd xərclərinin qarşılanmasına yönəldiləcək.
Güzəştli kateqoriyaya aşağıdakılar daxildir:
- keçmiş məcburi köçkünlər;
- valideynini itirmiş və ya valideyn himayəsindən məhrum olmuş tələbələr;
- Azərbaycan Respublikasının suverenliyi və ərazi bütövlüyü uğrunda həlak olmuş və ya əlil olmuş şəxslərin övladları;
- "Müharibə veteranı" adı almış şəxslər;
- orqanizmin funksiyalarının 61-100 faiz pozulması ilə əlilliyi müəyyən edilmiş şəxslər;
- 18 yaşınadək əlilliyi müəyyən edilmiş şəxslər;
- şəhid ailələrinin üzvləri;
- peşə təhsili müəssisələrində 20 yaşına çatmamış və orqanizmin funksiyalarının 81-100 faiz pozulmasına görə əlilliyi müəyyən edilmiş valideyni olan, aylıq gəliri yaşayış minimumundan aşağı olan şəxslər.
Bununla yanaşı, əhalinin aztəminatlı təbəqəsinin ali təhsilə çıxış imkanlarını artırmaq məqsədilə növbəti ilin dövlət büdcəsində Təhsil Tələbə Kredit Fonduna əlavə 15 milyon manat vəsait ayrılması nəzərdə tutulur.
Əvvəlki illərdə ayrılmış vəsaitlərlə birlikdə fondun ümumi resurs zərfi 141 milyon manata çatacaq.
