Müasir suvarma sistemlərinin yerli istehsala aid olmasına dair meyarlar təsdiqlənib.
Oxu.Az-ın məlumatına görə, bununla bağlı müvafiq qərar imzalanıb.
Qərara əsasən, sözügedən sistemlərinin yerli istehsala aid (Azərbaycan mənşəli) olması aşağıdakı meyarlardan hər hansı birinin tətbiqi əsasında müəyyən ediləcək.
Müasir suvarma sistemlərinin istehsalında iki və daha çox ölkə iştirak etdiyi halda malın mənşə ölkəsi kifayət qədər emalın/təkrar emalın həyata keçirildiyi ölkə hesab olunacaq. Kifayət qədər emal/təkrar emal meyarının tətbiqi obyekti xarici iqtisadi fəaliyyətin mal nomenklaturası (XİF MN) üzrə malların təsnifatlandırılması qaydalarına müvafiq olaraq müstəqil təsniflənmə obyekti qismində müəyyən edilmiş bu və ya digər məhsul sayılır.
Kifayət qədər emal/təkrar emal meyarı aşağıdakı şərtlərin yerinə yetirilməsi ilə ifadə olunur:
- ölkə ərazisində emal nəticəsində malın XİF MN üzrə mövqeyində ilk dörd rəqəmdən ən azı birinin səviyyəsində mal mövqeyinin (malın təsnifat kodunun) dəyişməsi;
- ölkə ərazisində kifayət qədər istehsal əməliyyatlarının və ya texnoloji əməliyyatların yerinə yetirilməsi nəticəsində tamamilə və ya qismən dəyişdirilməklə, XİF MN üzrə yeni mal koduna məxsus malın yaradılması.
Bu suvarma sistemlərinin istehsalı üzrə aşağıdakı əməliyyatlar malın kifayət qədər emalı/təkrar emalı meyarına cavab verməyən əməliyyatlardır:
- saxlanma və ya daşınma zamanı malın qorunmasının təmin edilməsinə dair əməliyyatlar;
- malın satışa və daşınmaya hazırlanmasına dair əməliyyatlar (partiyaların bölünməsi, göndərmələrin formalaşdırılması, çeşidləmə, təkrar qablaşdırma), qablaşdırmanın sökülməsi və yığılmasına dair əməliyyatlar;
- yuma, təmizləmə, tozun silinməsi, oksid, yağ və ya digər maddələrlə örtmə;
- boyama və ya pardaqlama üzrə əməliyyatlar;
- torbalara, yeşiklərə, qutulara qablaşdırma və qablaşdırmaya dair digər sadə əməliyyatlar;
- malların sökülməsi, yığılması, o cümlədən sadə yığım əməliyyatları və ya malların hissələrə ayrılması;
- yuxarıda qeyd olunan iki və ya daha artıq əməliyyatın kombinasiyası.
Əgər mala münasibətdə müstəsna olaraq bu sadalanan əməliyyatların keçirilməsi hesabına kifayət qədər emal/təkrar emal meyarı yerinə yetirilibsə, həmin malın mənşə ölkəsi bu əməliyyatların yerinə yetirildiyi ölkə hesab edilməyəcək.
Müasir suvarma sistemlərinin yerli istehsala aid olmasının müəyyən edilməsi məqsədilə aparılan ekspertiza zamanı xarici mənşəli materialların dəyərinin son məhsulun qiymətindəki müəyyən edilmiş payına əsaslanan advalor pay qaydası tətbiq edilir. Bu qaydaya əsasən xarici ölkə mənşəli materialların dəyəri, yekun məhsulun dəyərinin 35 (otuz beş) faizindən çox olmadıqda, həmin mal yerli istehsala aid (Azərbaycan mənşəli) hesab edilir.
Advalor pay qaydası tətbiq olunduğu hallarda dəyər göstəriciləri aşağıdakılara əsasən hesablanır:
- xarici mənşəli materiallar üçün - ərazisində son məhsulun istehsalının həyata keçirildiyi ölkəyə gətirilərkən, həmin materialların gömrük dəyərinə əsasən və ya son məhsulun istehsalının həyata keçirildiyi ölkə ərazisində onların rəsmi təsdiq edilmiş satış qiymətinə;
- son məhsul (mal) üçün - franko-zavod şərti üzrə olan qiymətə.
Malın mənşə ölkəsinin müəyyən edilməsi üçün onun istehsalı zamanı istifadə olunan istilik və elektrik enerjisinin, maşınların, avadanlıqların və alətlərin, həmçinin son məhsulun tərkibinə daxil olmayan və daxil edilmək üçün nəzərdə tutulmayan məhsulların mənşəyi nəzərə alınmır.
Maşınlar, avadanlıqlar, aparatlar və ya nəqliyyat vasitələri ilə istifadə olunmaq üçün nəzərdə tutulan ləvazimatlar, qurğular, ehtiyat hissələri və alətlər qeyd olunan maşınlar, avadanlıqlar, aparatlar və ya nəqliyyat vasitələri ilə bir komplektdə və həmin qurğularla adətən eyni sayda idxal edilirsə və satılırsa, onların mənşə ölkələri həmin avadanlıqların, aparatların və ya nəqliyyat vasitələrinin mənşə ölkələri ilə eyni hesab olunur.
Kifayət qədər emal meyarının tətbiqi zamanı, əgər mənşəyi bu Meyarların şərtlərinə cavab verən məhsul digər malın istehsalında istifadə olunursa, onda həmin məhsulun istehsalı üçün istifadə olunan materiallara tətbiq edilən mənşə tələbi malın mənşə ölkəsinin müəyyən edilməsi zamanı nəzərə alınmır.
Müasir suvarma sistemlərinin yerli istehsala aid olmasını təsdiq edən sənəd Azərbaycan Respublikasının Prezidenti yanında Antiinhisar və İstehlak Bazarına Nəzarət Dövlət Agentliyinin tabeliyində "İstehlak Mallarının Ekspertizası Mərkəzi" Məhdud Məsuliyyətli Cəmiyyəti tərəfindən təqdim edilən malın mənşə ölkəsinin müəyyən edilməsi barədə ekspertiza aktı hesab olunur.
