Bakı Apellyasiya Məhkəməsində yol-nəqliyyat hadisəsi törətməkdə təqsirləndirilən Ayaz Əliyevin barəsində verilən apellyasiya şikayəti üzrə məhkəmə iclası başa çatıb.
Oxu.Az "Pravda"ya istinadən xəbər verir ki, prosesdə qərar elan olunub.
Qərara əsasən, apellyasiya şikayəti təmin edilməyib, Bakı Ağır Cinayətlər Məhkəməsinin hökmü dəyişdirilib, təqsirləndirilən şəxsə təyin olunmuş yeddi il müddətinə azadlıqdan məhrumetmə cəzası 6 il 6 ay həddində müəyyən olunub. "Konstitusiya və Suverenlik İli" münasibətilə amnistiya elan edilməsi haqqında Milli Məclisin 19 dekabr 2025-ci il tarixli qərarının 3.2-ci bəndinə əsasən, Ayaz Əliyev barəsində müəyyən edilmiş cəza altı ilə endirilib.
İttihama görə, hadisə 2023-cü il mayın 28-də saat 21 radələrində paytaxtın Suraxanı rayonu, Hövsan qəsəbəsi ərazisində qeydə alınıb.
Belə ki, 1980-ci il təvəllüdlü Ayaz Vəli oğlu Əliyev idarə etdiyi "Nissan Tiida" markalı avtomobillə piyadalar üçün nəzərdə tutulan keçidin altından yolu keçən piyadalar - 1964-cü il təvəllüdlü Səkinə Baloğlan qızı Rəsulovanı, onun gəlini, 1984-cü il təvəllüdlü Samirə Xudayar qızı Cavadovanı və sonuncunun qızı, 2020-ci il təvəllüdlü Məryəm Nadir qızı Hüseynovanı vurub. Nəticədə hər üç piyada aldığı xəsarətlərdən hadisə yerində ölüb.
Ayaz Əliyevin barəsində Cinayət Məcəlləsinin 263.3-cü maddəsi ilə ittiham irəli sürülüb.
Qeyd edək ki, Ayaz Əliyev MMC-lərdən birində satış meneceri vəzifəsində çalışıb.
