Şəkərli qazlı və spirtli içkilərin müntəzəm istifadəsi saç tökülməsi riskini artırır, dəmir və D vitamini olan məhsullar isə keçəlləşmədən qoruyur.
Oxu.Az xəbər verir ki, bunu "Nutrition and Health" ("NutritHealth") jurnalında dərc olunan araşdırmanın nəticələri göstərib.
Alimlər belə qənaətə əvvəllər dərc olunmuş 17 elmi məqalənin meta-analizi nəticəsində gəliblər. Onlar ABŞ, Avropa və Asiyadan olan 61.332 nəfərin sağlamlıq vəziyyətini və qidalanma xüsusiyyətlərini qiymətləndiriblər. Subyektlərin ümumi sayının 97%-ni qadınlar təşkil edib.
Təhlil göstərib ki, qida rasionunda D vitamini və dəmirin miqdarının yüksək olması alopesiya ehtimalının aşağı olması və effektiv saç böyüməsi ilə əlaqələndirilir. Əksinə, alkoqol və şəkərli içkilərin istehlakı daha çox saç tökülməsi və erkən ağarma ilə müşayiət olunub.
Alimlər qeyd ediblər ki, soya məhsulları, brokoli və kələm kimi xaççiçəklilər fəsiləsinə aid tərəvəzlərin istehlakı saç tökülməsinin azalması ilə əlaqələndirilir. Bir sıra kompleks əlavələr də müsbət təsir göstərir, lakin bəzi klinik sınaqların keyfiyyəti orta və ya aşağı olub.
Müəlliflər vurğulayıblar ki, bunlar birbaşa səbəb-nəticə əlaqələri deyil, assosiasiyalardır, çünki tədqiqatların əksəriyyəti müşahidə xarakteri daşıyır, qidalanma və saçların vəziyyətini qiymətləndirmək üçün müxtəlif üsullardan istifadə edilib.
Buna baxmayaraq, ekspertlər hesab edirlər ki, saç tökülməsindən şikayətləriniz varsa, D vitamini və ferritin səviyyəsini (dəmir ehtiyatlarının göstəricisi) yoxlamaq, çatışmazlıq varsa, onu aradan qaldırmaq, şəkərli içkilər və spirt istehlakını məhdudlaşdırmaq məqsədəuyğundur. Onların fikrincə, bu yanaşma əsas dermatoloji terapiya ilə yanaşı saçların sağlamlığını qoruyub saxlamaq üçün sadə və sərfəli strategiya ola bilər.
