Oyma sənəti bəşəriyyətin ən qədim və zəngin sənət sahələrindən biri hesab olunur. Azərbaycan xalqının məişətində və incəsənətində də oyma özünəməxsus yer tutur. Bu sənət material, texnika, istifadə sahəsi və bədii məqsədinə görə müxtəlif növlərə bölünür. Onlardan biri də ağac oyma sənətidir.
Bu qədim sənəti yaşadan şəxslərdən biri olan Salyan şəhər sakini Rauf İbrahimov Oxu.Az-a 20 ildən çox davam edən yaradıcılıq yolundan danışıb.
Rauf İbrahimov deyib ki, oyma sənəti yüksək səbir və dəqiqlik tələb edir. Sənətə marağı isə hələ uşaqlıq illərindən başlayıb:
"Bu marağım məni Azərbaycan Dövlət Pedaqoji Universitetinə gətirdi. "Bədii qrafika" fakültəsində təhsil aldım. İxtisasca təsviri incəsənət və rəsmxət müəllimiyəm. İlk peşəkar işimi 2000-ci ildə qoz ağacından hazırlamışdım. Dörd əl işim var idi. Bir müddət fasilə versəm də, 2019-cu ildən yenidən oymaçılığa qayıtdım".
Usta əsasən qoz, qızılgöz və göyrüş ağaclarından istifadə edir. Onun diqqətçəkən əsərlərindən biri də böyük zəhmət və yaradıcılıqla ərsəyə gətirdiyi "Nizami kompozisiyası"dır. Bu iş şair Nizami Gəncəvinin 880 illiyinə həsr olunub və hazırlanması iki ay davam edib.
Rauf İbrahimovun yaradıcılığında "Nizami", "Aşıq Ələsgər", "Xocalı faciəsi", "Dəmir yumruq", "Morj", "Ov" və digər kompozisiyalar da xüsusi yer tutur.
Əli Məmmədov
