"Squid Game" serialının ikinci mövsümündə Azərbaycan bayrağı

"Netflix" yayım platformasında birinci mövsümün möhtəşəm uğurundan üç il sonra nəhayət Cənubi Koreya istehsalı olan kultlaşmış "Squid Game" serialının ikinci mövsümü yayımlanıb.

Böyük pul mükafatı uğrunda ölümcül riskə girən iştirakçılar haqqında film dünyanın hər yerindən olduğu kimi, Azərbaycandan da maraqla gözlənilib və izlənilib.

Oxu.Az-ın verdiyi məlumata görə, filmin dördüncü seriyasında bir detal isə - Azərbaycan bayrağı tamaşaçıların xüsusi marağına səbəb olub.

Belə ki, hadisələrin bir hissəsi məktəb həyətinə bənzər dekorasiyalarda cərəyan edir - iştirakçılar beş kiçik oyundan keçməlidirlər. Məkan müxtəlif ölkələrin kiçik bayraqları ilə bəzədilib, onların arasında Azərbaycan bayrağı da var.

Qeyd edək ki, "Kalmar oyunu" maddi çətinliklərini həll etmək üçün adaya yollanan və sağ qalma oyunlarına qatılan personajlardan bəhs edir. Onlar milyonlarla dollar qazanmaq üçün uşaqlıqda oynadıqları oyunları uğurla başa vurmalıdırlar. Rəqabətə tab gətirməyib uduzanlar isə ölürlər. Serial "Netflix"in indiyə qədər ən uğurlu şousu kimi tarixə düşüb. Yeri gəlmişkən, qeyd edək ki, serialın üçüncü mövsümü də artıq hazırdır və 2025-ci ilin ikinci yarısında yayımlanacaq.