Babək Əliyev: "Əminə çox utancaq qızdır, amma döyüş zamanı ikinci bir insana çevrilir"

"Çin döyüş növləri assosiasiyasıyıq - Vin Çun, uşu, kunq-fu bir yerdədir. Hər dörd ildən bir Gənclərin Olimpiya Oyunları təşkil olunur. Əminə də hələ yeniyetmədir. Əgər bu idman növünə davam etsə və yarışlara qatılsa, bir neçə il sonra olimpiadada iştirak edə bilər".

Bunu Oxu.Az-a müsahibəsində Prezident İlham Əliyevin İtaliyanın Peruca şəhərində keçirilən dünya çempionatında qızıl medal qazanan nəvəsi Əminə Əliyevanın şəxsi məşqçisi Babək Əliyev deyib.

- Əminənin kunq-fuya başlaması necə oldu? Onu bu idman növünə nə cəlb etdi?

- Mən Əminənin qardaşı Əlinin də məşqçisiyəm. Mənim döyüşlərimə baxdıqdan sonra Əminədə kunq-fuya həvəs yarandı. Sonradan bu idman növündə çıxış etmək istədiyini bildirdi.

- İlk məşqləriniz necə keçirdi?

- Məşqlərə hər zaman ciddiyyətlə yanaşırdıq. Bu səbəbdən də qısa müddətdə nailiyyət əldə etdik.

- Əminədə hansı potensialı gördünüz?

- Onun özündə döyüşkənlik var. Dəfələrlə bunu özünə bildirmişəm. Çox utancaq qızdır, amma döyüş zamanı ikinci bir insana çevrilir. Bunun sübutu kimi - hazırlıq zamanı eyni çəkidə, yaşda olan dünya çempionu olan idmançılarla döyüşdüyü zaman nəyə qadir olduğunu gördük.

- Yetirmənizi digər idmançılardan fərqləndirən əsas cəhətlər hansılardır?

- İdmançı xarakteri. Məğlub olmağı qətiyyən sevmədiyi üçün məşqlərdə daha çox çalışır.

- Onun ən güclü və inkişaf etdirilməsi lazım olan tərəfləri nələrdir?

- Dünya çempionluğu başlanğıcdır. Daha öncə karate ilə məşğul olub. Hətta taekvondo məşqləri də keçmişik. Əsas məsuliyyəti də üzərimə götürdüm və çempion olması üçün çalışdıq. Dərsləri ilə birlikdə idmana davam etməsi medal qazanmasına mane ola bilərdi. Çünki oxumaq enerjini çox alır və məşqlərimiz də ağır keçirdi. Əminə isə həm dərslərini, həm də məşqlərini çatdırdı. Özündən yaşca böyük idmançılarla qumluqda kilometrlərlə yol qaçırdı. Yaşı az olduğundan bəzi hallarda dayansa da, yenidən qaçmağa davam edirdi.

Milli komandaya dəvət olunduqdan sonra bütün nəzarəti üzərimə götürdüm. Çünki məşqlərimiz ağır keçirdi. Hətta bunun fəsadları da ola bilərdi, biz isə fəsadların olmaması üçün çalışırdıq.

- Əminə açıqlamasında olimpiya çempionu olacağını qeyd etdi. Bu idman növü isə olimpiya oyunlarına daxil deyil...

- Çin döyüş növləri assosiasiyasıyıq - Vin Çun, uşu, kunq-fu bir yerdədir. Hər dörd ildən bir gənclərin olimpiadası təşkil olunur. Uşu rəsmi olaraq ilk dəfə Dakar-2026 Gənclərin Olimpiya Oyunlarının proqramına daxil olacaq. Bu qərarı Beynəlxalq Olimpiya Komitəsi (BOK) 2020-ci il yanvarın 8-də verib. Əminə də hələ yeniyetmədir. Əgər bu idman növünə davam etsə və yarışlara qatılsa, bir neçə il sonra Gənclərin Olimpiya Oyunlarında iştirak edə bilər. Olimpiya çempionu olmasını çox istəyərik, lakin olimpiadaya qədər keçiriləcək döyüşləri də medalla başa vursa belə, bu çox yaxşı göstərici olacaq.

Qeyd edək ki, Babək Əliyev kunq-fu üzrə dünya çempionu adını qazanan ilk azərbaycanlı olub. O, doqquzqat dünya çempionu adına yiyələnib, beş dəfə isə dünyanın ən yaxşı texnikalı məşqçisi seçilib.

Anar Həsənov