Amerikalı aktyor Cim Kerri Los-Anceles şəhərindəki evinin qiymətini bir milyon dollar aşağı salıb.
Oxu.Az "Mansion Global"a istinadla xəbər verir ki, indi onun malikanəsinin dəyəri 18,75 milyon dollardır.
Aktyor evi 2023-cü ilin əvvəlində 28,9 milyon dollara satışa çıxarsa da, sonradan qiyməti bir neçə dəfə endirib.
1951-ci ildə tikilmiş evin ümumi sahəsi 929 kvadratmetrdir. Orada beş yataq otağı, ar-deko üslubunda şəxsi teatr, veranda və örtülü həyət mövcuddur.
Bitişik ərazidə qonaq evi, istirahət zonaları olan bağlar, solyarium, yoqa və meditasiya üçün meydança yerləşir. Həmçinin şəlaləli hovuz və tennis kortu da var.
