Baku TV-nin "Qapqara" verilişinin yeni buraxılışının qonağı Əməkdar artist Loğman Kərimov olub.
O, atasının mübarizə ilə keçən həyat yolundan söz açıb: "O zamanlar atam pul qazanmaq üçün Azərbaycandan İrana köçmüşdü. Orada inqilaba qoşuldu. Seyid Cəfər Pişəvərinin 101 fədaisindən biri idi. Bunu ilk dəfədir ki, etiraf edirəm. O zamanlar Milli Hökuməti qurdular, amma az yaşadı. Sonra SSRİ-nin, ingilislərin təzyiqi ilə bu hökumət dağıldı. Atamla anamı 5 il həbsdə saxladılar".
L.Kərimov, həmçinin "Qəzəlxan" filmində şair Əliağa Vahidi canlandırmasından bəhs edib:
"Konkret bir insanı oynamaq çətindir. Mənim üçün bu obrazın təsirindən çıxmaq uzun zaman aldı. Əliağa Vahid kimi bir insanı canlandırmaq böyük məsuliyyət idi. Bu filmə üç dəfə baxmışam. Hər dəfə izləyəndə görürəm ki, Əliağa Vahid çox əziyyət çəkib. O, yeganə şairdir ki, qəzəlləri hər gün radioda səsləndirilir".
