"Rossotrudniçestvo"nun rəhbəri Yevgeni Primakov Bakıdakı Rusiya mədəniyyət mərkəzinin (Rus evinin) fəaliyyətinə xitam verilməsi barədə Azərbaycandan nota aldığını təsdiqləyib.
Oxu.Az-ın məlumatına görə, o bu barədə "Rossiya-24" telekanalına müsahibəsində bildirib.
"Notada deyilir ki, bizim nümayəndəliyimiz - Rusiya İnformasiya və Mədəniyyət Mərkəzi (RİMM), xalq arasında "Rus evi" adlandırılan mərkəz, yerli qanunvericiliyə əsasən hüquqi şəxs kimi qeydiyyatdan keçməlidir", - deyə Primakov bildirib.
Azərbaycan tərəfi "Rossotrudniçestvo" agentliyinin ölkə ərazisində fəaliyyətinə xitam verilməsi barədə diplomatik kanallar vasitəsilə Rusiyaya rəsmi bildiriş göndərib.
Oxu.Az xəbər verir ki, bu barədə "Report"a məlumatlı mənbələrdən bildirilib.
Daha əvvəl analoji qərarın ABŞ-nin USAID agentliyi ilə bağlı verildiyini nəzərə alaraq (hətta Prezident Donald Trampın andiçmə mərasimindən və onun bu strukturu ləğv etmək barədə sonrakı qərarından əvvəl), bu addım müasir Azərbaycanın öz milli maraqlarını qorumaq istiqamətində ardıcıl kursu davam etdirdiyinin bir daha sübutudur və haradan qaynaqlanmasından asılı olmayaraq, kənar müdaxilələrə artıq dözmək niyyətində olmadığını göstərir.
Azərbaycan özü donora çevrilib və xüsusilə qeyri-şəffaf sxemlər əsasında və strukturu açıq şəkildə kəşfiyyat xarakterli olan təşkilatlar vasitəsilə verilən kənar yardıma ehtiyacı yoxdur.
