“Türkiyə və Azərbaycan arasında yüksək səviyyəli qardaşlıq və dostluq münasibətlərinin əsasında xalqlarımızın ortaq tarixi, dili, dini, milli-mənəvi dəyərləri dayanır. Bu gün dövlət başçılarımızın şəxsi dostluğu və qardaşlığı, siyasi iradəsi və qətiyyəti sayəsində bu münasibətlər “Bir millət, iki dövlət” prinsipi əsasında bütün sahələr üzrə hərtərəfli inkişaf edərək, özünün ən yüksək zirvəsinə - müttəfiqlik səviyyəsinə çatıb”.
“Report”un xəbərinə görə, bu fikirləri Milli Məclisin sədri Sahibə Qafarova bu gün Türkiyə Böyük Millət Məclisinin (TBMM) sədri Numan Kurtulmuş ilə görüşü zamanı səsləndirib. O, iki il öncə imzalanmış Şuşa Bəyannaməsinin Azərbaycan-Türkiyə əlaqələrini tamamilə yeni müstəviyə qaldırdığını vurğulayıb.
Milli Məclisin sədri Sahibə Qafarova Azərbaycan və Türkiyənin bütün məsələlərdə həmrəylik, qarşılıqlı dəstək nümayiş etdirdiyini, həm sevincli, həm də kədərli, çətin günlərdə bir-birinin yanında olduğunu deyib. O, İkinci Qarabağ müharibəsinin ilk dəqiqələrindən etibarən, o cümlədən, cari ildə Azərbaycan Ordusunun antiterror tədbirləri zamanı Prezident Rəcəb Tayyib Ərdoğan başda olmaqla, qardaş Türkiyə dövlətinin və xalqının Azərbaycanın haqq işinə öz açıq siyasi və mənəvi dəstəyini nümayiş etdirdiyini xatırladaraq, qeyd edib ki, bu gün Azərbaycanla Türkiyənin birliyi və həmrəyliyi, birgə fəaliyyəti, həyata keçirdiyi irimiqyaslı layihələr regional və beynəlxalq səviyyədə sabitliyə, təhlükəsizliyə və əməkdaşlığa töhfə verir.
Görüşdə Milli Məclisin sədri Sahibə Qafarova 2023-cü ilin həm Azərbaycanın, həm də Türkiyənin həyatında tarixi yubileylərlə zəngin olduğunu vurğulayaraq, bu il Azərbaycan xalqının Ümummilli Lideri, müstəqil Azərbaycan dövlətinin qurucusu, görkəmli siyasi və dövlət xadimi Heydər Əliyevin anadan olmasının 100-cü ildönümünün yüksək səviyyədə qeyd edildiyini, həmçinin Türkiyə Cümhuriyyətinin yaranmasının 100-cü ildönümünün tamam olduğunu bildirib.
Numan Kurtulmuş isə ölkələrimiz arasında münasibətlərin bugünkü yüksək səviyyədə olmasından məmnunluğunu ifadə edərək, Sahibə Qafarovanın bu səfərinin də əlaqələrimizə töhfə verəcəyinə inamını bildirib.
TBMM sədrinin sözlərinə görə, Azərbaycan və Türkiyə arasında strateji müttəfiqlik münasibətləri durmadan inkişaf edir. Ölkələrimiz bir çox məsələlərin həllində ortaq hərəkət edir. O, Azərbaycan və Türkiyə arasında əməkdaşlıq və işbirliyi sayəsində regionda mövcud olan problemlərin həll mərhələsinə daxil olduğunu, bu əməkdaşlığın Cənubi Qafqazda sülh və sabitliyin təmin olunmasında önəmini diqqətə çatdırıb.
17:54
“Bəzi lobbilərin Azərbaycanın döyüş meydanında qazandığı qələbəsinə kölgə salmaq üçün kampaniyalar apardığının fərqindəyik”.
“Report” xəbər verir ki, bunu Türkiyə Böyük Millət Məclisinin (TBMM) sədri Numan Kurtulmuş oktyabrın 26-da Ankarada Azərbaycan Milli Məclisinin sədri Sahibə Qafarova ilə görüşdə deyib.
O qeyd edib ki, bütün dünya, o cümlədən ATƏT-in keçmiş Minsk qrupunun həmsədrləri (ABŞ, Rusiya, Fransa) illərlə Qarabağ münaqişəsinin həlli üçün heç bir iş göstərməyiblər, həll yolu təklif etməyiblər: “Beləliklə, Azərbaycanın qətiyyətli mövqeyi və hərbi müdaxiləsi nəticəsində işğal faktına son qoyuldu”.
TBMM sədrinin sözlərinə görə, indi döyüş meydanında qazanılan qələbənin danışıqlar masası ətrafında uğurla yekunlaşdırılması vaxtıdır:
“Azərbaycanın bütün beynəlxalq platformalarda haqlı mübarizəsinə hələ də mane olmağa çalışanların olduğunun fərqindəyik”.
N.Kurtulmuş əlavə edib ki, Azərbaycan döyüş meydanındakı qələbəsinə kölgə salmaq istəyənlərə də qalib gələcək:
“Bu haqlı mübarizədə də qalib gələcəksiniz. Bu məsələ birdəfəlik həllini tapacaq. Xüsusilə, regionumuzdakı və dünyadakı proseslər göstərir ki, qarşıdakı dövrdə ciddi proseslər olacaq”.
