Yüksək vəzifəyə təyin olunan general Hikmət Mirzəyev - DOSYE + VİDEO

Xüsusi Təyinatlı Qüvvələrin komandanı, general-leytenant Hikmət Mirzəyev müdafiə nazirinin müavini - Quru Qoşunlarının komandanı təyin edilib.

General-leytenant Ənvər Əfəndiyev müdafiə nazirinin müavini - Quru Qoşunlarının komandanı vəzifəsindən azad olunub.

Oxu.Az xatırladır ki, Vətən Müharibəsi Qəhrəmanı, general-leytenant Hikmət İzzət oğlu Mirzəyev Biləsuvarda anadan olub.

O, Birinci Qarabağ müharibəsində xüsusi təyinatlı taborun tərkibində döyüşüb.

Hikmət Mirzəyev ulu öndər Heydər Əliyevin prezident olduğu illərdə “polkovnik-leytenant” rütbəsini daşıyıb. Ona “polkovnik” rütbəsini də məhz Heydər Əliyev təqdim edib.

Hikmət Mirzəyev 2002-ci ilin 19 yanvarında Heydər Əliyevin imzaladığı sərəncamla “general-mayor” hərbi rütbəsini alıb.

Hikmət Mirzəyev 2020-ci ilin sentyabrın 27-də başlayan və noyabrın 10-dək davam edən Vətən müharibəsində Cəbrayılın və Şuşanın azad edilməsi əməliyyatlarına başçılıq edib.

Prezident İlham Əliyevin 2020-ci ilin oktyabrın 17-də imzaladığı sərəncamla Hikmət Mirzəyevə “general-leytenant” hərbi rütbəsi verilib.

Hikmət Mirzəyev adını tarixə Şuşa fatehi kimi yazdırıb.

Şuşa işğaldan azad olan gün Azərbaycan Prezidenti, Silahlı Qüvvələrin Ali Baş Komandanı İlham Əliyev Hikmət Mirzəyevə zəng edib.

Ali Baş Komandan Şuşa şəhərinin işğaldan azad edilməsində qəhrəmancasına və rəşadətlə iştirak etmiş hərbi qulluqçulara, Silahlı Qüvvələrimizin bütün şəxsi heyətinə təbriklərini çatdırıb. 

Onu da bildirək ki, 2016-cı ilin aprel döyüşlərində torpaqların azad edilməsində əsas rol oynayan xüsusi təyinatlılar 2018-ci ildə Ordunun 100 illiyi münasibəti ilə keçirilən hərbi paradda general Hikmət Mirzəyevin başçılığı altında iştirak ediblər.

Təltifləri:

1 yanvar 1994-cü ildə “Azərbaycan Bayrağı”, 24 iyun 2015-ci ildə “Vətənə xidmətə görə” 3-cü dərəcəli, 7 noyabr 2023-cü ildə “Qarabağ” ordeni ilə təltif olunub.

“Hərbi xidmətdə fərqlənməyə görə” 3-cü dərəcəli, “Hərbi xidmətdə fərqlənməyə görə” 2-ci dərəcəli, “Hərbi xidmətdə fərqlənməyə görə” 1-ci dərəcəli medallara layiq görülüb.

26 iyun 2001-ci ildə “Azərbaycan Silahlı Qüvvələrinin 10 illiyi” yubiley, 24 iyun 2003-cü ildə “İgidliyə görə”, 21 iyun 2007-ci ildə “Vətən uğrunda”, 26 iyun 2008-ci ildə “Azərbaycan Silahlı Qüvvələrinin 90 illiyi” yubiley, 26 iyun 2013-cü ildə “Azərbaycan Silahlı Qüvvələrinin 95 illiyi” yubiley, 26 iyun 2018-ci ildə “Azərbaycan Ordusunun 100 illiyi” yubiley, 9 dekabr 2020-ci ildə “Vətən Müharibəsi Qəhrəmanı”, 24 dekabr 2020-ci ildə “Cəbrayılın azad olunmasına görə”, 25 dekabr 2020-ci ildə “Füzulinin azad olunmasına görə”, 29 dekabr 2020-ci ildə “Qubadlının azad olunmasına görə”, 29 dekabr 2020-ci ildə “Şuşanın azad olunmasına görə”, 29 dekabr 2020-ci ildə Kəlbəcərin azad olunmasına görə”, 24 iyun 2021-ci ildə “Xocavəndin azad olunmasına görə” medalları ilə təltif olunub.

Yüksək vəzifəyə təyin olunan general Hikmət Mirzəyev - DOSYE + VİDEO