Nazirlik rus dili ilə bağlı millət vəkilinə cavab verdi
Nazirlik rus dili ilə bağlı millət vəkilinə cavab verdi
“Şükür Allaha ki, Azərbaycan xalqının taleyini o həll etmir”.
Millət vəkili Sabir Rüstəmxanlı rus dilli məktəblərin dövlət büdcəsindən maliyyələşdirilməsinin qarşısının alınmasını təklif edib.
Oxu.Az Gün.Az-a istinadən xəbər verir ki, bununla bağlı Milli Məclisdə çıxış edən S.Rüstəmxanlı arqument kimi Konstitusiyaya və “Təhsil haqqında” Qanuna istinad edib.
“Azərbaycan Konstitusiyasına, eləcə də təhsil Qanununa görə, təhsil dili Azərbaycan dilidir. Xarici dildə məktəblər ancaq özəl ola bilər, dövlətdən maliyyələşdirilə bilməz.
Amma bu gün Azərbaycanda rus dilində çoxlu məktəb var və dövlətdən maliyyələşdirilir. Bu qanun niyə pozulur? Mən Hesablama Palatasından xahiş edirəm ki, bu məsələni araşdırsın”, - deyə, millət vəkili sözlərinə əlavə edib.
Məsələ ilə bağlı Gün.Az-ın sorğusuna cavab olaraq Təhsil Nazirliyindən S.Rüstəmxanlının dediklərinin heç bir əsasının olmadığını və Azərbaycan dilli məktəblərlə yanaşı, xarici dilli məktəblərin dövlət büdcəsindən maliyyələşdirilməsinin Qanunlar çərçivəsində həyata keçirildiyini deyiblər.
“Azərbaycanın ümumtəhsil məktəblərində tədris 3 dildə - Azərbaycan, rus və gürcü dillərində aparılır. Bunların hamısında Azərbaycanın dövlət təhsil standartları tətbiq olunur. Tədris dilləri müxtəlif olsa da, bunlar Azərbaycan məktəbləridir və təbii ki, dövlət ümumtəhsil məktəbləri dövlət tərəfindən maliyyələşdirilir”- deyə, nazirlikdən bildiriblər.
Məsələnin hüquqi tərəfinə gəldikdə isə, qeyd edək ki, təhsil müəssisələrində rus sektorunun dövlət tərəfindən maliyyələşdirilməsi məsələsi ilə bağlı nə Azərbaycan Respublikası Konstitusiyasında, nə də, “Təhsil haqqında” Qanunda heç bir məhdudiyyət nəzərdə tutulmayıb.
Əsas Qanunun 42-ci maddəsi (təhsil hüququ) Azərbaycan təhsil müəssisələrinin fəaliyyətinə dair hər hansı bir maliyyə çərçivəsi nəzərdə tutmur.
Eyni şey “Təhsil haqqında” Qanuna da aiddir. Bu Qanunun 7-ci maddəsində (tədris dili) “Azərbaycan Respublikasının təhsil müəssisələrində tədris dili dövlət dili - Azərbaycan dilidir” haqqında informasiya ilə yanaşı bildirilir ki, (7.2.bəndində) “vətəndaşların və təhsil müəssisələrinin istəyi nəzərə alınaraq ümumtəhsil müəssisələrində təhsil müvafiq dövlət təhsili standartları çərçivəsində Azərbaycan dili, Azərbaycan tarixi, Azərbaycan ədəbiyyatı və Azərbaycan coğrafiyası mütləq tədris olunmaq şərti ilə başqa dillərdə də aparıla bilər”.
Azərbaycan Sosial Demokrat Partiyasının sədri Araz Əlizadə 1news.az-a müsahibəsində qeyd edib ki, Sabir Rüstəmxanlı belə popurist fikirlər səsləndirməklə özünü milli maraqların müdafiəçisi kimi göstərməyə və bununla da siyasi gündəmdə qalmağa çalışır.
“S.Rüstəmxanlının rus məktəblərinin fəaliyyəti ilə bağlı iddiası xəstə təfəkkürün məhsuludur.
O, yaxşı şair idi, nəşriyyat rəhbəri kimi də özünü doğruldub, lakin o demək deyil ki, Rüstəmxanlı yaxşı azərbaycanlıdır” – deyən Əlizadənin fikrincə, uşaqların çox dil bilməsi onların gələcəyi üçün əhəmiyyətlidir.
“İngilis dilinin mövqeyi ölkədə o qədər möhkəm deyil ki, rus dilindən imtina edək”.
Həmçinin, A.Əlizadə, buraxılış sinifdə oxuyan rus bölməsi tələbələrindən neçəsinin Azərbaycan dilini səlis bildiyini də yoxlamağa ehtiyac olduğunu bildirib.
“S.Rüstəmxanlı nə istəyirsə söyləyə bilər. Şükür Allaha ki, Azərbaycan xalqının taleyini o həll etmir”,- A.Əlizadə deyib.