"Xəzər dənizi üzərində temperatur təxminən 1,2 dərəcə artıb, İranın dağlıq bölgələrində isə illik ifadədə təxminən 3 dərəcə artıb".
Oxu.Az-ın məlumatına görə, bu barədə Azərbaycan Milli Elmlər Akademiyasının (AMEA) baş elmi əməkdaşı Elnur Səfərov WUF13 çərçivəsində keçirilən və IDEA İctimai Birliyi tərəfindən təşkil edilən "Yeni şəhər gündəmi üçün ilham qaynağı: Dayanıqlı şəhərlər üçün hava keyfiyyətinin və yaşıl infrastrukturun inteqrasiyası" adlı yüksək səviyyəli forumda panel müzakirəsi zamanı bildirib.
Onun sözlərinə görə, temperaturun artması və iqlim proseslərinin dəyişməsi çirkləndirici maddələrin şəhərlər üzərində ilişib qalmasına gətirib çıxarır. Məsələn, müəyyən hava şəraitində Bakıda çirklənmə yayılmır və bu da insanların sağlamlığına və hava keyfiyyətinə mənfi təsir göstərir.
"Bu baxımdan, Azərbaycan və Özbəkistan alimləri hava keyfiyyətinin monitorinqi üzrə birgə layihəyə başlayıblar. Pilot ərazilər olaraq Abşeron yarımadası, Bakı və Sumqayıt seçilib. İqlim modellərindən istifadə edərək ölçmə stansiyalarının quraşdırılması və çirklənmələrin 72 saatlıq proqnozlaşdırma sisteminin yaradılması planlaşdırılır.
Azərbaycan komandası vəziyyəti şəhər səviyyəsində təhlil edəcək, Özbəkistandan olan mütəxəssislər isə regional külək axınlarını və atmosfer sirkulyasiyasını təhlil edəcəklər. Layihənin məqsədi çirkləndirici maddələrin Mərkəzi Asiyadan Xəzər regionuna daşınmasını proqnozlaşdırmaqdır", - deyə o bildirib.
Alim vurğulayıb ki, hava çirkliliyi ilə effektiv mübarizə üçün beynəlxalq əməkdaşlıq, peyk məlumatları, modelləşdirmə, coğrafi informasiya sistemləri və birgə tədqiqatlar zəruridir. Onun sözlərinə görə, ancaq bu yolla problemin həllinə yaxınlaşmaq və insanların həyatını və ekosistemləri qorumaq mümkündür.
