Abşeron rayonunun Ceyranbatan qəsəbəsi, Gündüz Abdullayev küçəsi, 28 ünvanını sakinləri küçə itləri ilə bağlı ciddi narahatlıq keçirirlər.
Onlar Baku TV-nin qaynar xəttinə müraciət edərək aidiyyəti qurumlardan kömək istəyiblər.
Qəsəbədə baş vermiş hadisə narahatlığın əsassız olmadığını bir daha göstərib. Sakinlərdən biri - Rəfiqə Hüseynova küçə itlərinin hücumuna məruz qalıb:
"Nəvəmlə mağazaya gedirdik. Uşaq dedi ki, it var. Birdən üstümə hücum etdi, qolumdan dişlədi. Burada küçə itləri çoxdur. Şükürlər olsun ki, nəvəmin üstünə cummadı, yoxsa özümü bağışlaya bilməzdim", - zərərçəkən bildirib.
Ətraflı süjetdə:
Abşeron rayonunun Ceyranbatan qəsəbəsində küçə iti nənə və nəvəyə hücum edib.
Oxu.Az "Report"a istinadən xəbər verir ki, qəsəbə sakini Rəfiqə Hüseynova nəvəsi ilə birgə mağazaya gedərkən sahibsiz itin qəfil hücumuna məruz qalıb. Yaralanan qadın dərhal xəstəxanaya yerləşdirilib və ona quduzluq əleyhinə vaksin vurulub.
Hadisə ilə bağlı Ceyranbatan qəsəbəsi bələdiyyəsinə və ərazi nümayəndəliyinə müraciət olunub. Qurumdan bildirilib ki, sahibsiz itlərin toplanması ilə bağlı onlara maliyyə vəsaiti ayrılmadığı üçün bu sahədə tədbir görmək imkanları yoxdur.
Abşeron Rayon İcra Hakimiyyətindən isə vurğulanıb ki, sahibsiz heyvanların yığılması məqsədilə Sahibsiz İtlərə Qayğı Mərkəzləri rayon ərazisində sivil və humanist üsullarla tədbirlər görür. Belə ki, təhlükə yaradan itlər küçə və prospektlərdən xüsusi avtomobillərlə toplanaraq qayğı mərkəzinə aparılır. Hazırda proses davam etdirilir.
Qeyd edək ki, Abşeron rayonunda Sahibsiz Heyvanlara Qayğı Mərkəzinin yaradılması istiqamətində sənədləşmə işləri aparılır.
