"Bakı Metropoliteni" QSC-nin bu gün yaydığı əməkhaqqı ödənişləri ilə bağlı açıqlamasına metro işçilərinin reaksiyası gecikməyib.
Bir qrup metropoliten əməkdaşının Oxu.Az-a ünvanladığı müraciətdə bildirilib ki, verilən açıqlama həqiqətə uyğun deyil.
"Yanvar ayından bizim maaşlarımızda əlavə edilməli olan 10% artım ödənilmir. Bu barədə də bizə heç bir səbəb göstərən yoxdur. Məsələ mətbuata çıxandan sonra bildirildi ki, işçilər yaranmış vəziyyəti anlayışla qarşılasınlar. Düşündük ki, yəqin artımlar ödəniləcək. Bu gün isə rəsmi açıqlama yayıblar ki, ödənilməmiş əməkhaqqı öhdəliyimiz yoxdur. Necə yoxdur? On aydır ki, heç bir əməkdaşa bu artımlar ödənilmir. Bəs bu borc deyil? Bəs onu bizə kim ödəməlidir? Pulumuzu kim verəcək?", - deyə müraciətdə vurğulanıb.
Qeyd edək ki, "Bakı Metropoliteni" QSC-də maaşlara edilən əlavələrin ödənilməməsi ilə bağlı məlumat saytımızda yayımlanıb.
"Bildiririk ki, Sərəncamın icrasından irəli gələrək "Bakı Metropoliteni" QSC tərəfindən cari ilin yanvarın 1-dən müvafiq tədbirlər həyata keçirilərək minimum əməkhaqqında edilən dəyişiklik qanunvericiliyin tələblərinə uyğun olaraq işçilərin əməkhaqqına tətbiq olunub.
Bakı Metropoliteni üçün işçilərin rifahı və əməyinin dəyərləndirilməsi prioritet məsələdir. Hazırda bu məqsədlərə uyğun əməkhaqqı fondunun təsdiqlənməsi ilə bağlı müzakirələr aparılır. Struktur islahatları çərçivəsində maliyyə və təşkilati məsələlərlə yanaşı, əməkhaqlarına yenidən baxılması da kompleks şəkildə nəzərdən keçirilir.
Həmin prosesin həyata keçirilməsi müəyyən zaman tələb edir və biz əməkdaşlarımızın bu mərhələni anlayışla qarşıladıqlarına inanır, onlara təşəkkürümüzü bildiririk", - qurumun cavabında bildirilmişdi.
Əzizə İsmayılova
"Bakı Metropoliteni" Qapalı Səhmdar Cəmiyyətində əməkhaqqı ödənişləri Cəmiyyətin təsdiq edilmiş büdcəsi çərçivəsində, əməkhaqqı fondunun ayrılmış məbləğinə uyğun olaraq plan üzrə və tam həcmdə həyata keçirilir. Ödənişlərin icrası əmək müqavilələrinin şərtlərinə və Azərbaycan Respublikasının əmək qanunvericiliyinin tələblərinə uyğun şəkildə təmin olunur.
Oxu.Az xəbər verir ki, bu barədə "Bakı Metropoliteni" QSC məlumat yayıb.
Qeyd olunub ki, Azərbaycan Respublikası Prezidentinin 23 dekabr 2024-cü il tarixli Sərəncamına əsasən, minimum aylıq əməkhaqqının məbləği 2025-ci il yanvarın 1-dən 400 manat müəyyən edilib.
"Sözügedən Sərəncamın icrasından irəli gələrək, "Bakı Metropoliteni" QSC tərəfindən cari ilin yanvarın 1-dən etibarən müvafiq tədbirlər həyata keçirilib, minimum əməkhaqqında edilən dəyişikliklər qanunvericiliyin tələblərinə uyğun olaraq əməkdaşların əməkhaqqına tətbiq edilib. Hazırda Bakı Metropolitenində əməkhaqqı qanunvericiliyin tələblərinə tam uyğundur və qurumun ödənilməmiş əməkhaqqı öhdəliyi yoxdur.
Əməkhaqqı artımları Cəmiyyətin təsdiq edilmiş büdcəsi, gəlir və xərclər nəzərə alınmaqla, korporativ idarəetmə prinsipləri çərçivəsində qəbul edilən qərarlar əsasında həyata keçirilə bilər. Hazırda Cəmiyyətin belə artımlarla bağlı hər hansı öhdəliyi mövcud deyil.
Əməkhaqqı məbləğlərinə dair hər hansı dəyişiklik və ya yenilənmə baş verdiyi halda, bu barədə əməkdaşlar və aidiyyəti qurumlar rəsmi qaydada məlumatlandırılacaq", - qurumdan bildirilib.
