"Azərbaycanın azad edilmiş ərazilərində infrastruktur çox sürətlə bərpa edilir".
Oxu.Az xəbər verir ki, bunu "Report"a açıqlamasında gürcüstanlı jurnalist və blogerlərdən ibarət qrupun tərkibində Azərbaycana səfər çərçivəsində Gəncəyə gələn, Tbilisi Qara Dəniz Beynəlxalq Universitetinin professoru Nika Çitadze deyib.
O, bundan əvvəl Bakıda olsa da, Qarabağa və Azərbaycanın digər bölgələrinə ilk dəfə getdiyini söyləyib:
"Bu səfərlə bağlı təəssüratlarımın çox zəngin olduğunu deyə bilərəm. Azərbaycanın necə inkişaf etməsinin, xüsusilə də ərazi bütövlüyünü bərpa etdikdən sonra həyata keçirdiyi genişmiqyaslı layihələrin şahidiyəm. Həqiqətən, azad edilmiş ərazilərdə infrastruktur çox sürətlə bərpa olunur".
N.Çitadze beynəlxalq münasibətlər üzrə mütəxəssis kimi Qarabağ münaqişəsinin səbəbləri barəsində məlumatlı olduğunu vurğulayıb:
"Birinci və İkinci Qarabağ müharibələrini, onların səbəblərini və s. diqqətlə öyrənmişəm. İndi isə azərbaycanlı dostlarımızın dəstəyi ilə Qarabağda səfər etmək imkanı qazandıq. Müharibə dövründə azərbaycanlıların necə döyüşdüyünü, sülh dövründə isə o əraziləri necə bərpa etdiklərini gördüm. Fikrimcə, regionda yaradılan sülh şəraiti uzunmüddətli olacaq. Çünki münaqişənin yenidən alovlanması ehtimalı demək olar, sıfıra endirilib".
Professor daha sonra Azərbaycan-Gürcüstan münasibətlərinə toxunaraq, ikitərəfli əlaqələrin daha da dərinləşəcəyinə inandığını bildirib:
"Türkiyə-Azərbaycan münasibətlərini, dostluğu alqışlayıram. Eynilə Gürcüstan və Azərbaycan arasında olan münasibətlər də bu qəbildəndir. İnanıram ki, münasibətlərimiz və əməkdaşlığımız gələcəkdə daha da dərinləşəcək".
