Xətai rayonunun Babək prospekti, 78 ünvanında yaşayan sakinlər həyətdə yerləşən qarajların sökülməsi ilə bağlı narazılıqlarını bildiriblər.
Sakinlərin sözlərinə görə, bir müddət əvvəl onlara həyət ərazisində abadlıq işlərinin aparılacağı və bu məqsədlə uzun illərdir istifadə etdikləri dəmir qarajların söküləcəyi bildirilib.
Oxu.Az xəbər verir ki, bu barədə Baku TV-nin videomaterialında deyilir.
Lakin sakinlər iddia edirlər ki, üstündən xeyli vaxt keçməsinə baxmayaraq, ərazidə hər hansı abadlıq işi aparılmayıb.
"Dedilər ki, burada icra hakimiyyəti ilə bələdiyyə öz hesabına abadlıq işləri aparacaq və bizim dəmir qarajların bir qismi layihəyə düşür. Biz də soruşduq ki, layihəni göstərin, baxaq. Nazirlər Kabinetinin qərarı varsa, ona tabe olaq. Təəssüflər olsun ki, bizə heç bir qərar göstərmədən "sökülməlidir" dedilər", - deyə sakin Baku TV-yə bildirib.
Onun sözlərinə görə, qarajların sökülməsi ilə bağlı sakinlərə alternativ yer də təklif edilməyib:
"Dedik ki, müvafiq yer verin, qarajlarımızı oraya yerləşdirək. Təəssüflər olsun ki, bunu etmədilər. Bəzi şəxslər vəzifələrindən sui-istifadə edərək dəmir qarajlarını saxladılar. Amma bizim qarajlarımız rəsmi sənədlərimiz ola-ola götürüldü".
