"Deyilənə görə, şübhə dünyanın ən qorxulu və sağalmaz xəstəliyidir. Bir dəfə insanın ürəyinə düşdüsə, bir də onu oradan təmizləmək olmur. Bəzən inamsızlıq böyük, uşaq, dost, həyat yoldaşı demədən insanların ağlını bütünlüklə ələ ala bilir. Hər hansı şübhəyə düşən şəxs sosial şəbəkə hesablarının birində axtarış çubuğuna "yoxlama" yazır və nəticədə onlarla yoxlanış səhifələri qarşısına çıxır.
Sosial şəbəkələrdə münasibətləri yoxlayan səhifələr artıq ayrıca xidmətə çevrilib. Sevgilisindən, nişanlısından, hətta həyat yoldaşından şübhələnənlər bu səhifələrə müraciət edir. Qarşı tərəfə saxta profillə yazılır, münasibət qurmağa cəhd edilir və verilən reaksiyaya əsasən nəticə çıxarılır".
Oxu.Az xəbər verir ki, bu barədə Xəzər TV-nin videoreportajında bildirilib.
Qeyd olunur ki, səhifələrin iş prinsipi isə sadədir. Sifarişçi qarşı tərəfin profilini təqdim edir. Səhifə isə həmin şəxslə əlaqə yaratmağa çalışır. Bəzən bir mesaj kifayət edir, bəzən isə söhbət daha da irəli gedir. Əsas məqsəd isə eynidir: qarşı tərəfin yad bir insanın diqqətinə necə reaksiya verdiyini görmək.
Amma burada başqa bir sual ortaya çıxır. Bir insanın xəbəri olmadan onun sosial şəbəkə hesabını araşdırmaq, haqqında məlumat toplamaq və yazışmalarını üçüncü şəxsə ötürmək nə qədər qanunidir?
Hüquqşünas Ruslan Mustafazadənin fikrincə, burada konkret olaraq hansı məlumatın toplandığı, necə əldə edildiyi və harada paylaşıldığı hüquqi qiymətləndirmə baxımından əhəmiyyət daşıyır:
"Şəxsi məlumatlarla bağlı məsələni sosial şəbəkələrdə iki yerə ayırmaq lazımdır. Bir şəxsin profil yaradan zaman hər kəs üçün, yəni onu izləyən, onunla dostluğu olan şəxslər üçün açıq qoyduğu məlumatlar və gizli qoyduğu məlumatlar.
Təbii olaraq, açıq qoyduğu məlumatların əldə olunması, toplanması, kiməsə ötürülməsi hər hansı bir ciddi əməl hesab edilmir. Amma həmin şəxsin digərindən gizli saxladığı şifrələrin və sairə məlumatların əldə edilməsi və başqa şəxslərə ötürülməsi cinayət əməli kimi hesab edilə və Azərbaycan Respublikasının Cinayət Məcəlləsinə görə həmin şəxslərə cəza verilə bilər".
Münasibəti yoxlamaq istəyən tərəf üçün bu sadəcə bir sınaq ola bilər. Amma digər tərəfin xəbəri və razılığı olmadan aparılan araşdırma artıq şəxsi həyat məsələsinə çevrilir. Xüsusilə də paylaşımlar şəxsi və ailə həyatı sirri olan məlumatları özündə ehtiva edirsə, bu birbaşa cinayət əməli kimi qiymətləndirilir.
Hüquqşünas Mircavid Miriyev bildirib ki, Azərbaycan Respublikası Cinayət Məcəlləsinin 156.1-ci birinci maddəsinə əsasən şəxsi və ailə həyatı sirri olan məlumatların və belə məlumatları əks etdirən sənədlərin, video və fotoçəkilişi materiallarının, səsyazılarının yayılması, habelə satılması və ya başqasına verilməsi cinayət əməli hesab edilir və həmin şəxslər barəsində 1000 manatdan 2000 manatadək miqdarda cərimə və ağırlaşdırıcı halda isə bir ilədək müddətdə islah işləri cəzası tətbiq edilir.
