ABŞ və İran dolayı danışıqlar gedişində münaqişənin nizamlanması planının icra mexanizminin və zəmanətlərin razılaşdırılması mərhələsinə keçiblər.
Oxu.Az xəbər verir ki, bu barədə Səudiyyə Ərəbistanının "Al Arabiya" telekanalı adı açıqlanmayan yüksəkvəzifəli bir mənbəyə istinadən məlumat yayıb.
Məlumata əsasən, vasitəçilər Vaşinqtonun mövqeyini artıq İranın xarici işlər naziri Abbas Əraqçıya çatdırıblar.
Hazırda tərəflər arasında əsas müzakirə mövzuları razılaşmaların yerinə yetirilmə ardıcıllığı və ilk addımı hansı tərəfin atacağı məsələləridir.
"Reuters" agentliyinin məsləhətləşmələrin gedişinə bələd olan rəsmiyə istinadən bir müddət əvvəl yaydığı xəbərə görə, Əraqçı Dohada qətərli vasitəçilərlə görüş zamanı etimadın möhkəmləndirilməsi planı ilə bağlı ABŞ tərəfinin şərhlərini əldə edib. Nazirin həmin təklifləri Tehranda müzakirə edəcəyi planlaşdırılır. Agentliyin məlumatına əsasən, əsas fikir ayrılıqları iyunda imzalanmış ABŞ-İran anlaşma memorandumunun genişləndirilmiş variantına qayıtmağı hədəfləyən plan çərçivəsində atılacaq addımların ardıcıllığı ilə bağlıdır.
