Araşdırılma aparılan zaman "Goranboy Rayon Mərkəzi Xəstəxanası" publik hüquqi şəxsin (Xəstəxana) Stomatologiya bölməsinin diş texniki vəzifəsində çalışan Sərdərov Ağayar Məcid oğlunun əmək müqaviləsinə hər hansı bir dəyişikliyin olunmadığı və onun öz vəzifə üzrə əmək funksiyalarını icra etdiyi müəyyən edilib.
Bu barədə Oxu.Az-ın sorğusuna cavab olaraq Tibbi Ərazi Bölmələrini İdarəetmə Birliyindən (TƏBİB) məlumat verilib.
Bildirilib ki, Əmək Məcəlləsinin 49-cu maddəsinin birinci hissəsinə görə, əmək müqaviləsi və ya ona dəyişiklik tərəflərin gücləndirilmiş elektron imzası ilə imzalandıqda, son imzalanma tarixindən əmək müqaviləsi bağlanılmış və ya ona dəyişiklik edilmiş hesab olunur və hüquqi qüvvəyə minir:
"Azərbaycan Respublikası Əmək Məcəlləsinin 59-cu maddəsinə əsasən başqa işə keçirilməyə yalnız işçinin razılığı ilə, həmçinin əmək müqaviləsinə əlavə və dəyişikliklər edilməklə və ya yeni əmək müqaviləsi bağlanılmaqla yol verilir. Həmin məcəllənin 46-cı maddəsinin altıncı hissəsinə əsasən elektron sənəd formasında bağlanılan əmək müqavilələrində dəyişiklik edildikdə, ilkin əmək müqaviləsi yenidən tərtib olunaraq təsdiq edilir, yeddinci maddənin ikinci hissəsinə əsasən əmək münasibətləri əmək müqaviləsi elektron informasiya sistemində elektron sənəd formasında bağlandıqda yaranır.
Qeyd olunanlar nəzərə alınmaqla, A.Sərdarovun diş həkimi vəzifəsinə keçirilməyi ilə bağlı Xəstəxana tərəfindən verilmiş əmrin hüquqi qüvvəsinin olmadığını nəzərinizə çatdırırıq".
TƏBİB-dən qeyd edilib ki, həkim-stomatoloq həkim, diş həkimi və diş texniki isə orta tibb ixtisası hesab olunur və Azərbaycan Respublikası Əmək və Əhalinin Sosial Müdafiəsi Nazirliyinin Kollegiyasının 19 iyun 2017-ci il tarixli 8 nömrəli Qərarında diş həkimi vəzifəsinin tutulma şərtlərində diş həkimi işləri ixtisası üzrə orta ixtisas təhsili tələbinin olduğu qeyd olunub.
Aləmdə Nəsib
Sosial şəbəkədə Goranboy Rayon Mərkəzi Xəstəxanasının Səhiyyə Xidmətlərinin Təşkili şöbəsinin Stomatologiya bölməsində diş texniki vəzifəsində çalışan Ağalar Sərdərovun diş həkimi vəzifəsinə keçirilməsi ilə bağlı əmrin görüntüsü yayılıb. Sözügedən dəyişiklik ictimai müzakirələrə səbəb olub və bəzi istifadəçilər bu təyinatın hüquqi əsasının olmadığını bildiriblər.
Məsələ ilə bağlı Goranboy Rayon Mərkəzi Xəstəxanasının İnsan Resursları şöbəsinin əməkdaşı İlqar Hüseynov Oxu.Az-a açıqlamasında bildirib ki, faktla bağlı araşdırma aparılır. Onun sözlərinə görə, Səhiyyə Nazirliyinin 3 iyun 2015-ci il tarixli, 42 nömrəli əmrinə əsasən, bu təyinat qeyri-qanuni hesab olunmur:
"Həmin əmrə əsasən, diş texniki ixtisasını bitirən şəxslər diş həkimi vəzifəsində işləyə bilərlər. Burada əsas fərq ondan ibarətdir ki, həkim-stomatoloq və diş həkiminin öhdəlikləri fərqlidir. Məsələ ilə bağlı araşdırma aparılır və yaxın zamanda rəsmi açıqlama veriləcək".
Qeyd edək ki, sözügedən məsələ ilə bağlı Tibbi Ərazi Bölmələrini İdarəetmə Birliyinə (TƏBİB) sorğu ünvanlansaq da, hələlik cavab almaq mümkün olmayıb.
Xatırladaq ki, əmri imzalayan Arzu Teymurov Goranboy Rayon Mərkəzi Xəstəxanasının baş həkimidir və işdən çıxarılan direktor Rauf Ruzvay oğlu Yahyayevi müvəqqəti olaraq əvəz edir.
Aləmdə Nəsib
