ABŞ Prezidenti Donald Tramp paytaxt Vaşinqtonda təyyarə və helikopterin toqquşması nəticəsində sağ qalanın olmadığını açıqlayıb.
Oxu.Az TASS-a istinadən xəbər verir ki, bunu dövlət başçısı brifinqdə deyib.
Tramp həmçinin qeyd edib ki, sərnişin təyyarəsinin ekipajı düzgün hərəkət edib:
"Vaşinqtondakı qəzaya, əslində, helikopter səbəb olub".
Xatırladaq ki, əvvəl "American Airlines" şirkətinə məxsus "Bombardier CRJ700" təyyarəsi Vaşinqtonda Reyqan adına Milli Hava Limanı yaxınlığında "Sikorsky H-60 Black Hawk" hərbi helikopteri ilə toqquşduqdan sonra Potomak çayına düşüb.
Vaşinqtonda mülki təyyarə ilə hərbi helikopterin toqquşduğu ərazidən 30-dan çox sərnişinin meyiti çıxarılıb.
Oxu.Az xəbər verir ki, bu barədə NBC televiziya kanalı məlumat yayıb.
Qeyd olunub ki, axtarış təyyarənin düşdüyü Potomak çayında aparılır.
Vaşinqton səmasında sərnişin təyyarəsi ilə hərbi helikopterin toqquşmasının səbəbi dispetçerin səhvi ola bilər.
Oxu.Az xəbər verir ki, CNN dispetçerlə helikopter heyəti arasında baş tutmuş dialoqun bəzi detallarını öyrənə bilib.
Belə ki, dispetçer toqquşma ehtimalının yüksək olduğunu müşahidə edib və dərhal məlumatı helikopter heyətinə ötürüb. Ardınca helikopterin pilotu manevr etmək və toqquşmadan qaçmaq üçün vizual icazə tələb edib.
Nəzarətçi helikopteri idarə edən pilota kursu dəyişməyə icazə versə də, hündürlüyü dəyişməyin qadağan olunduğunu məruzə etməyib. O, təyyarəyə yol verib sonra onun arxasında uçmağı əmr edib, lakin qısa müddət sonra təyyarə vertolyotla toqquşub.
Vaşinqtonda hərbi helikopterlə sərnişin təyyarəsinin toqquşması nəticəsində 18 nəfər həyatını itirib.
Oxu.Az xəbər verir ki, bu barədə CBS televiziyası polisə istinadən məlumat yayıb.
Qeyd olunub ki, son məlumata görə, Potomak çayından 18 nəfərin meyiti çıxarılıb. Ümumilikdə sərnişin təyyarəsinin göyərtəsində 64 nəfər olub.
Polis Reyqan Milli Hava Limanı yaxınlığında hərbi helikopterlə toqquşan təyyarənin göyərtəsində olmuş şəxslərin bir neçəsinin cəsədini Potomak çayından çıxarıb.
Oxu.Az xəbər verir ki, bu barədə "The Washington Post" nəşri məlumat yayıb.
Hazırda xilasedicilər Potomak çayında təyyarə və onunla toqquşmuş helikopterdə olan şəxslərin axtarışını aparırlar.
Vaşinqtonun Reyqan Milli Hava Limanı yaxınlığında sərnişin təyyarəsi "Sikorsky H-60" ("Black Hawk") hərbi helikopteri ilə toqquşub.
Oxu.Az xəbər verir ki, bu barədə ABŞ Federal Aviasiya Administrasiyası (FAA) məlumat yayıb.
Təyyarənin göyərtəsində 60 sərnişin və 4 ekipaj üzvü olub.
Bildirilib ki, sərnişin təyyarəsi hərbi helikopterlə toqquşaraq Potomak çayına düşüb.
Qeyd olunub ki, qəzaya görə hava limanı fəaliyyətini müvəqqəti dayandırıb.
İnsan itkisi və xəsarət alanlar barədə dəqiq məlumat hələ yoxdur.
Artıq ABŞ Prezidenti Donald Tramp qəza ilə bağlı məlumatlandırılıb.
